LUXUBE izinhlobo ezahluke zomculo uhlu lwabaculi abazonandisa kwindumezulu yomcimbi ozohambisana noweMetro FM Music Awards ozoba sePeoples Park eMoses Mabhida eThekwini ngomhla ka-25 kwephezulu.
Lo mcimbi ozobizwa ngeMetro FM Music Festival kulindeleke ukuthi udonse izinkumbi zabantu abazojabulela ukubuya kwala ma-award eThekwini kwazise sekuneminyaka wagcina ukwenzeka kuleli dolobha.
Umcimbi wama-award uzokwenzelwa eNkosi Albert Luthuli International Convention Centre lapho kuzobe kuklonyeliswa izintandokazi zabantu beminxa eyahlukene.
Abazohambela umcimbi osePeoples Park nabo bazoba yingxenye yalo mcimbi njengoba abaculi abanye babaculi abaqokiwe nabazonqoba bezophinde banandise khona.
Abanye abazobe bephuma e-ICC bazodlulela ePeoples Park njengoba uzobe usufana ne-after party.
Phakathi kwabaculi abazobe beboshelwe ePeoples Park kubalwa uMthandeni SK, Khuzani, Umafikizolo, Young Stunna, Tira, Lamiez Holworthy, Danki Boi, Sox, Drega, Dladla Mshunqisi, Big NUZ, Sami Kay, Amenisto, Lerato Kganyago, Benny Maverika nabanye abaningi.
Abaphathi bohlelo uSomizi Mhlongo, Tbo Touch, Zola Zee Loving, Hope Mbhele, Skhinkili, Mgilane, Sizwe Mdlalose nabanye.
Amathikithi alo mcimbi aseqalile ukutholakala eWebticket, Pick n Pay naseBoxer ngo-R300 ajwayelekile noR750 awezicukuthwane.
Lo mcimbi kubhekwe ukuthi ube ngomunye wemikhulu njengoba kulindeleke ukuthi udlale indima emqoka ukuthuthukisa nomkhakha wezokuvakasha ngaphansi kukaMasipala weTheku.
