KULINDELEKE ukuba yethulwe ngoLwesihlanu, eThekwini, incwadi equkethe umlando wephephandaba ILANGA.
Le ncwadi esihloko sayo sithi, “Ulibambe Lingashoni! A History of Ilanga laseNatal, ehlelwe nguSolwazi uBongani Ngqulunga, wayibhala ngokubambisana nezinye izifundiswa, inezahluko ezingaphezu kuka-10 eziqukethe umlando waleli phephandaba elingelidala kunawo wonke awesiZulu, njengoba lineminyaka ewu-122, kanjalo nomlando ngabasunguli balo uJohn Langalibalele Dube, uMafukuzela, nowakwakhe uNokutela Dube.
Ekhuluma naleli phephandaba uSolwazi uNgqulunga, uthe kuningi okuzohlonyulwa abafundi ngale ncwadi.
“Inhloso bekungukuthi le ncwadi ngiyethule ngo-2023, ngesikhathi ILANGA lihlanganisa iminyaka ewu-120 lasungulwa, kodwa kwaba nezihibe njengoba sizoyethula ngoLwesihlanu. Siyibhale ngokuhlanganyela nezinye izifundiswa ezisondelene kakhulu nomlando weLANGA nezibhale kakhulu ngomlando kaMafukuzela,” esho.
