ANGAPHEZULU kuka-1300 amacala abhekene nezisebenzi zakwaSassa ezikhalelwe ngamasongo kaS’gonyela ngeledlule eGauteng. Abasolwa abawu-11 bayanyaniswa namacala enkohlakalo yokukhwabanisa imali eholelwa izakhamizi zakuleli.
Namuhla abasolwa bazofaka izicelo zokudedelwa ngebheyili eNkantolo yeMantshi yaseLenasia eGoli. Bayamaniswa nezinsolo zokukhwabanisa imali yakwa-SASSA engaphezulu kuka-R260 million.
ISassa wuhlaka olubhekelela imisebenzi okubalwa kuyona ukuholela izibonelelo zikahulumeni, futhi lunezisebenzi ezilinganiselwa ku-4000 ezweni lonke.
Okhulumela iSASSA kuzwelonke uMnu Paseka Letsatsi uthe konke kuyekelelwe ezandleni zabomthetho ukuba benze uphenyo. Abasolwa baboshwa ngemuva kokuba kwabanjwa abesifazane ababili bephethe amakhadi asolisayo, kwesinye sezitolo zokudla.
Uphenyo lwamaphoyisa lwaholela ekutheni kutholakale namanye amakhadi amaningi kulaba besifazane. Emuva kokuba bephonswe imibuzo kwabe sekudlulelwa emotweni eyayinezisebenzi zakwaSassa.
Ngaphakathi emotweni kwatholakala amakhadi akwaSassa awu-139, awu-60 awasebhange iTyme Bank, awu-8 aseFNB, izithombe zomazisi babantu nama-passport ayisihlanu.
Uphenyo lwamaphoyisa luholele ekutheni kugcine sekuboshwa abantu abawu-11 maqondana nalezi zinsolo. Bonke ababoshiwe bazofaka izicelo zokudedelwa ngebheyili namuhla.
