USHAYE indesheni kumalungu omphakathi ukuba abambisane nezinhlaka zezomthetho ukuze kuzoba lula ukubhekana nempi yobugebengu obudla lubi kuleli uNdunankulu waKwaZulu-Natal, uMnu Thami Ntuli.
UNtuli ubethula inkulumo esithangamini sabezindaba ebesibanjelwe emahhovisi kahulumeni eMayville, ngaphandle kweTheku, ngoLwesibili. Ingqikithi yalesi sithangami, uNtuli ubezokwethula isiteshi zamaphoyisa ezingoma-hamba endlwana.
Lezi ziteshi ezine zizobekwa ezindaweni ezihamba phambili ngokwezibalo zobugebengu. Lo mholi uthe kuningi okuzohlonyulwa ngamalungu omphakathi kulezi zimoto.
“Indawo yaseNanda ingenye yezindawo ezihamba phambili ngokwezibalo zamacala, ikakhulukazi ubugebengu obunyantisa igazi. Eyodwa kulezi ezintathu izohanjiswa eBulwer. Enye sizoyibeka KwaMakhutha kanti lena yesine izohanjiswa KwaMbonambi.
“Ngiyayinxusa imiphakathi ukuba yenze konke okusemandleni ukuqinisekisa ukuthi lezi zimoto ziyavikeleka. Kalukho usizo olutholakala esiteshini samaphoyisa olungekho kulezi zimoto. Ngaphakathi emotweni kukhona ngisho nesitokisi okuzogcinwa kuwona izephulamthetho,” kusho uNtuli.
