Kwethulwe umlawuli kumasipala waseMkhanyakude

ABENGABONWA nangokhalo amakhansela e-ANC emhlanganweni womkhandlu kaMasipala wesiFunda uMkhanyakude obewubanjwe ngaphansi kwezimo ezinzima. Lo mhlangano ububizwe yihhovisi likaNgqongqoshe wezokuBusa ngokuBambisana nezoMdabu KwaZulu-Natal uMfu Thulasizwe Buthelezi ngenhloso yokwethula umlawuli kulo mkhandlu. 

Ungqongqoshe wethule uMnu Bamba Ndwandwe oke wasibamba lesi sikhundla eminyakeni eyedlule. Echaza ngesizathu sokufaka lo masipala ngaphansi komlawuli, uthe kuningi okungalungile okwenzeka kuwona okubalwa kukhona nenkinga yokungaphathwa kahle kwemali yabakhokhintela. 

“Kungidumazile ukuthi sifike lapha sithole ukuthi iziqhwaga zalapha zivale isango lomkhandlu, ngoba kuzanywa ukuvinjwa thina. Sibabhalele abaphethe lomkhandlu kodwa bakhetha ukungafiki. Sizokwethula nophenyo oluzoqalwa maduze.

“Konke esikwenzayo sikwenza ngoba sigunyazwa wumthetho. Usomlomo womkhandlu wenqabile ukubiza umhlangano, okuyilapho mina ngisebenzise amandla enginawo ngawubiza lo mhlangano,” kusho uButhelezi.

Ephawula uNdwandwe ushaye ngamafushane, wathi yena usebenza ngokubhalwe phansi futhi usebenza ngokulandela umyalelo kangqongqoshe. 

Ngaphandle kwesango lomkhandlu, bekunengxenye yezisebenzi zalo mkhandlu ebezicula izingoma zomzabalazo, ziphikisana nokwethulwa kukaNdwandwe.