YETHULWE uNdunankulu wesifundazwe KwaZulu-Natal uMnu Thami Ntuli inkulumo yokwakha abaholi bakusasa abanohlonze abahola izitshudeni emanyuvesi akuleli namazwe omhlaba.
Le ingqungquthela eqale mhlaka – 30 kuyona lenyanga, ubanjelwe eDurban University of Technology(DUT) eThekwini, izophethwa namhlanje ngoLwesihlanu.
UMnu Ntuli utshele izitshudeni ukuthi ukuthuthuka koMnotho nokwakhiwa kwezwe elizinzile, kulele kuzona.
Kule ngqungquthela kuhlangene imkhandlu yezitshudeni ehola emanyuvesi I-Student Representative Council(SRC). Utshele izitshudeni ukuthi njengoba zihola phambili emanyuvesi, kumele zicabangele ikusasa ekuholeni kwazo.
“Ukuqokwa ukuba uphathe abantu, akuyona into elula. Ngakho-ke ikusasa Labantu lisezandleni zenu ngoba umthente uhlaba usamile. Kungenzeka ukuba Uma seniqedile ukufunda, niqokwe nihole emazingeni ezifundazwe nakuzwelonke,” kusho uMnu Ntuli.
Uthe umnotho wakulelizwe usezandleni zabo uma bezophatha ngobuqotho kusukela kusona lesi sigaba sasenyuvesi.
Ngakolunye uhlangothi umphathi waseDUT uSolwazi Thandwa Mthembu, uthe ukuhlanganiswa kwabaholi bezitshudeni kule ngqungquthela yokucobelelwa kwabo ngolwazi, kungenxa yokuthi nemibhikisho yezitshudeni emanyuvesi elimaza nengqalasizinda, iholwa phambili yibona abaholi.
Uthe okuhlosiwe ngukuthi bacijelwe ikusasa nokuhola ngobuqotho ukuze bakwazi ukuthatha izinqumo zokuhola abantu ngendlela efanele.
