UKHALE ngabajoyina i-ANC ngezinhloso zabo zokuzizuzisa owayengumengameli wayo, uMnu Thabo Mbeki, ngesikhathi kunesifundo sokuvuselela leli qembu eRoyal Hotel, eThekwini ngoMgqibelo.
UMbeki ubethula lesi sifundo kumalungu e-ANC, abeqhamuka ezinhlakeni ezahlukene nakumagatsha ayo. Ubemenywe wubuholi besifundazwe ngenhloso yokucathulisa lawa malungu ngokubaluleka kokuvuselela leli qembu kabusha, njengoba liqhubeka nokwehlelwa yisibalo samalungu ezindaweni ebelizidlela amahlanga kuzona.
UMbeki uthe phambilini abantu babejoyina uKhongolose ngenhloso yokulwela abantu ukuba bakhululeke, kodwa manje
izinto sezishintshile. Uthe ekuhambeni kweminyaka leli qembu liqale laheha nabantu abangalungile, abebengenazo izinhloso zokulandela imithetho yalo, kodwa abesebebona ithuba lokugwilika.
Uthe nokho uyajabula ukuthi kukhona leli qembu elikwenzayo ukuzihlanza kulawa malungu athinteka ezenzweni eziphambene nemigomo yalo. Uphinde wancoma isibindi sikaKhomishana wamaPhoyisa KwaZulu-Natal, uLt-Gen Nhlanhla Mkhwanazi ngokuphumela obala ‘ngobekwenzeka’ emaphoyiseni, okugcine kuholela ekusungulweni kweKhomishini kaMadlanga.
UMbeki ungomunye wabaholi be-ANC asebeke baphumela obala ngokungahambisani nendlela uMengameli Cyril Ramaphosa ahola ngayo. I-ANC eKZN ithi izifundo zalolu hlobo zizokwazi ukusiza amalungu nabaholi bayo, ukuze bazi ngokumele bakwenze ukubuyisa ithemba kubantu.
Kuzokhumbuleka ukuthi leli qembu lahlangabezana nenkulu imbibizane okhethweni lwangonyaka odlule, njengoba lalahleke-lwa ngamandla okuphatha izwe ngalodwana, obekuqala ukwenzeka kusukela kwaqala uhulumeni wentando yeningi, ngo-1994.
Lokhu kwagcina kuphoqe ukuba i-ANC yakhe ubudlelwano namanye amaqembu ukuze kubunjwe uhulumeni.
