LIHLEHLISELWE umhla ka-14 kuNcwaba (August) kulo nyaka icala lokuphehla udlame emphakathini elibhekene noNkk Duduzile Zuma-Sambudla.
Lokhu kuvele namuhla ngoLwesine eNkantolo eNkulu eThekwini ngesikhathi ummeli wakhe u-Adv Dali Mpofu noYuri Gangai omele umbuso benza izethulo phambi kweJaji uCharmani Bolton.
Kulindeleke ukuthi kufike usuku lomhla ka-14 kuNcwaba iNational Director of Public Prosecutions (NDPP) isisithathile isinqumo ngokuthi umbuso unobufakazi obenele yini ukushushisa uNkk Zuma-Sambudla. Ummeli kammangalelwa ufuna lihoxishwe leli cala njengoba bekholwa wukuthi linenhlese yepolitiki.
Okhulumela iNPA uMnu Mthunzi Mhaga uthe ukholwa wukuthi umbuso unobufakazi obanele ukuthi kuqale ukuqulwa kwecala.
“Abammeli bakammangalelwa bafake isicelo sokubuka izitatimende zofakazi bethu. Akukho thina ebesingakwenza ngoba kuyilungelo likammangalelwa. Kodwa-ke siyethemba ukuthi kuzoqala ukuqulwa kwecala ngomhla ka-10 kuLwezi (November),” esho.
UNkk Zuma-Sambudla, oyilungu lePhalamende ngethikithi leMK Party, ubhekene necala lokuphehla udlame emphakathini nokuvukela umbuso (terrorism) elisuselwa ezigamekweni zangesikhathi sezibhelu zokutashwa kwempahla nokushiswa kwezitolo namadepho ngoNtulikazi (July) ku-2021.
Abephume ngezinkani amalungu nabaholi beMK Party enkantolo ukuyokweseka uNkk Zuma-Sambudla, ophume eseshesha enkantolo, eyongena emotweni, wangakhuluma nabezindaba abebemlindile ngaphandle.
