LIDLULELE esigabeni sokuqulwa icala elibhekene nomsakazi woKhozi FM uSiyabonga “Siya” Mhlongo, obhekene necala lokushaya ngenhloso yokulimaza owesilisa “oyisinqandamathe sakhe”.
USiya ubevele izolo ngoMsombuluko eNkantolo yeMantshi yaseThekwini lapho umshushisi waleli cala, uNkz Shanenaaz Hoosen, etshele iMantshi ukuthi isigaba sePretrial Conference sesifike emaphethelweni, kasikho isivumelwano esitholakele phakathi kwezinhlaka ezithintekayo.
Utshele inkantolo ukuthi isisulu esisebenza eGoli siphakamise usuku lwango mhla ka-25 kuMbas1 (April) ukuthi kuqale ukuqulwa ngalo icala. Imantshi uMhlonipheni Sibiya iluvumele lolu suku, yaliguqisa icala.
Ukudlulela kulesi sigaba kwaleli cala kushiye ebumnyameni ikusasa likaSiya emsakazweni njengoba imithombo yeLANGA engaphakathi kulo msakazi yaveza ukuthi abaphathi baveza ukuthi udaba lokubuyela kwakhe emoyeni liyokhulunywa uma kuphela icala, okubukeka lisazothatha isikhathi.
Izikontileka zabasakazi balo msakazo womphakathi ziyaphela ekupheleni kwale nyanga, kanti kuthiwa seziqalile izingxoxo nabangase babuye.
USiya usolwa ngokushaya isisulu ngebhodlela ebusweni. Isisulu satshela leli phephandaba ukuthi USiya wavukwa yisikhwele ngemuva kokuba sivaleliswe ngomunye wabangani baso wesilisa, ababehlezi naye endaweni yobumnandi emgaqweni uFlorida, eThekwini.
Sathi lo wesilisa wathi “mncwa mncwa” ebhekise kuso, naso saphendula kanjalo, okuyikho okwanenga uSiya.
