LIMISIWE emsebenzini iphoyisa elisesizingeni likaSayitsheni lasewestern Cape njengoba kulindeleke ukuthi libhekane nokuqondiswa izigwegwe ngezinsolo zokudlwengula owesifazane ngoKhisimusi esiteshini samaphoyisa eMalmesbury eCape Town.
Ngokubika kweSABC okhulumela amaphoyisa aseWestern Cape uBrigadier Novela Potelwa uthe izikhulu zamaphoyisa kulesi sifundazwe zisigxekile lesi sigameko sokudlwengula.
Uthe kuyadumaza ukuthi umuntu womthetho okumele ngabe nguyena ovikela umphakathi nguyena osolwa ngezinsolo zalolu hlobo.
Uqhube ngokuthi amaphoyisa azokwenza uphenyo lwangaphakathi ukuze leli phoyisa lithathelwe izinyathelo ezifanele ngalesi senzo salo.
Uveze ukuthi leli phoyisa lisolwa ngokudlwengula owesifazane oneminyaka ewu-41 ubudala ngaphakathi esiteshini emahhovisi abaphenyi.
Leli cala labikwa emaphoyisa lase selikhalelwa ngamasongo kaSgonyela njengoba icala liphenywa i-IPID.
