SISUSIWE ohlwini lwamacala aseNkantolo eNkulu yase-Goli isicelo salowo owabe engumengameli wezwe uJacob Zuma sokuba ashushise ngokwakhe umengameli waseNiingiziu Afrika uMnu Cyril Ramaphosa.
Lokhu kuza ngemuva kokuba abammeli bakhe betshele le nkantolo ngoLwesine ukuthi ngemuva kokuvumelana nohlangothi lombuso baqoke ukungabe besaqhubeka nalesi sicelo esafakwa uZuma eNkantolo ngo-2022.
Kulesi sicelo uZuma wayefuna ukushushisa uRamaphosa ngoba emsola ngokuputshuza ulwazi oluyimfihlo ngesimo sakhe sempilo.
Enkantolo, uAdv khosi Pama-Sihunu, ongummeli kaZuma ukuqinisekisile phambi kwejaji ukuthi bavumelene nombuso ukuthi kungabe kusaqhutshekwa nalesi sicelo.
Kwenzeka lokhu nje, ekuqaleni kwaleli sonto iNkantolo yoMthethosisekelo isichithile isicelo sokuphonsela inselelo isinqumo seNkantolo eNkulu yokuDluliswa kwamaCala esachitha uZuma kulolu daba, ngesizathu sokuthi azikho izizathu ezibambekayo ezingenza lesi sicelo siphumelele uma siyolalelwa kabusha kunoma Iyiphi inkantolo enkulu.
