LUGCINE lugobile uphondo kuNgqongqoshe wezeMali uMnu Enoch Godongwana njengoba iHhovisi likaMgcinimafa kuzwelonke limemezele ukuthi ngeke isanyuka intela yokuthenga iVAT obekumele inyuke ngo-0.5% ngomhla ka-1 kuNhlaba (May).
Lokhu kuchaza ukuthi izakhamizi zaseNingizimu Afrika sezingawehlisa amaphaphu njengoba le ntela izoqhubeka nokuhlala ku-15%.
Lokhu kuza ngemuva kwengcindezi amaqembu epolitiki abeyifakela uGodongwana, we-ANC.
Kwenzeka lokhu nje, bekulindelwe siphume ngesonto elizayo isinqumo seNkantolo ePhakeme yaseWestern Cape odabeni olufakwe yiDA ne-EFF, bekhala ngokuthi ukwenyuswa kweVAT kwenziwe ngendlela engekho emthethweni. I-DA ithi isinqumo sikaGodongwana sidalwe yingcindezi yokuthi icala belizomchitha enkantolo.
Ngakolunye uhlangothi, i-Action SA ithi kuye ngamagama enkehli njengoba yayithembisile ukuthi izolwa ukuqinisekisa ukuthi kayenyuswa iVAT. Ithi nakuba yavokutela ukuphasiswa kwesabelomali ePhalamende, beyazi ukuthi ngeke yenyuswe iVAT njengoba yethula kwi-ANC ezinye izindlela uhulumeni angathola ngazo imali ngaphandle kokucindezela kakhulu abantu abentulayo.
UGodongwane uthe ukungenyuswa kweVAT kulahlekisela uhulumeni imali elinganiselwa ku-R75 billion, okuzophoqa ukuba kuncishiswe isabelomali kwezinye izinhlelo, ezinye zihoxiswe.
