INHLANGANO ebhekele ukhetho kuleli, i-Electoral Commission of South Africa (IEC), ithi ukhetho lohulumeni basekhaya luzoba phakathi komhla ka-2 kuLwezi (November) 2026, nasekupheleni kukaMasingana (January) wangonyaka ozayo.
Usuku lokhetho luzomenyezelwa nguNgqongqoshe wezokuBusa ngokuBambisana nezoMdabu kuzwelonke, uMnu Velenkosini Hlabisa. Amaqembu azongenela ukhetho esewonke awu-470, ngokusho kwesikhulu esiphezulu se-IEC, uMnu Sy Mamabolo. Kula maqembu, awu-34 ngamasha.
“Umtheho olawula ukhetho uthi njengoba iskhathi saleli hlandla siphela ngomhla ka-1 kuNovember, njengoba ukhetho lokugcina lwalungomhla ka-1 November 2021, kufanele ukhetho lubanjwe zingakapheli izinsuku ezingu-90 kuphele ihlandla,” kuchaza uMamabolo.
Amaqembu angenela ukhetho abengakaqali ukukhankasa njengoba i-IEC iyaye ikhiphe imali yokuxhasa amaqembu uma ekhakasa. Kukhona amaqembu angangeneli ukhetho kuzwelonke, angenela komasipala nasezifundazweni kuphela.
