PHUMLANI GAMA
LUQOKWE ngumholi webandla lamaNazaretha aseBuhleni, iNkosi uMduduzi “Nyazilwezulu” Shembe, usuku lokufihlwa kukaMfu uMzwenkosi Gcwensa (70) (osesithombeni), obebambe elikhulu iqhaza kuleli bandla.
UGcwensa udlule emhlabeni ngeledlule ngemuva kokungeniswa esibhedlela, exinwe wukugula. Ubeseneminyaka engaphezulu kuka-20 engumfundisi kuleli bandla. Uzofihlwa emzini wakhe eMaphephetheni, eNdwedwe ngoLwesithathu. Okhulumela leli bandla, uMnu Thokozani Mncwabe, utshele iLANGALempelasonto ukuthi umufi waba yilungu laleli bandla kusukela ezalwa.
Uveze ukuthi unina kaGcwensa wayenenkinga yokungabatholi abantwana, kwathi ngokuhamba kwesikhathi, wayocela enkosini yaleli bandla engasekho, uGalilee “iLanga” Shembe, emuva kwalokho wakhulelwa, wazala yena. Uthe kusukela ngosuku adlule ngalo emhlabeni, alokhu engenile amazwi enduduzo avela ebantwini okubalwa kubona nabaholi bemikhakha eyehlukene.
