BHEKI NDLOVANA
UHULUMENI uthi zonke izifundazwe zizohlomula ngengqungquthela enkulukazi yabaholi bamazwe ayingxenye yeqoqo elibizwa ngokuthi yiG2O, njengoba ngonyaka ozayo izosingathwa yiNingizimu Afrika.
UNkz Khumbudzo Ntshavheni, ongungqongqoshe eHhovisini likaMengameli wezwe uMnu Cyril Ramaphosa, uthi izifundazwe zizohlomula ngokusingatha imihlangano ezobe yandulela omkhulu wabaholi. Usho lokhu ngesikhathi ebika mayelana nokudingidwe emhlanganweni wakamuva wekhabhinethi.
Uthi ngaphambi kosuku olukhulu lwengqungquthela yabaholi, kuzoba nemihlangano engaphezu kuka-130 ezokwenzelwa ezifundazweni ezahlukene, okubalwa kuzo neKwaZulu-Natal.
Uqhube wathi ukwenzelwa kwale ngqungquthela kuleli kuzobeka iNingizimu Afrika ebalazweni lomhlaba, kuyihlomulise ngethuba lokubonakala njengezwe elibalulekile entuthukweni yomhlaba.
Amazwe ayingxenye yeG20 kubalwa kuwo i-South Africa, Canada, China, France, Argentina, Australia, Italy, Brasil, Germany, India, Indonesia, Mexico, Japan, Korea, Saudi Arabia, Russia, Türkiye, UK ne-USA, kanti kungena ne-African Union (AU) kanye ne-European Union (EU).
Leli yiqoqo lamazwe anomnotho oqhakazile nothuthukayo, kanti asuke ehlangene ngakho ukudingida ngezithinta umnotho emhlabeni, kanjalo nokuqinisa ubudlelwano bezokuhwebelana.
Komengameli bamazwe ayingxenye yeG20 abalindeleke ukuba bawethamele lo mhlangano kubalwa noMnu Donald Trump osandwa kuqokwa njengomengameli ozothatha izintambo zombuso kuMnu Joe Biden ophumayo. Nokho akukaqinisekiswa ukuthi uTrump uzoza yini kulelo, kanti uMengameli Ramaphosa uthe umlindele uTrump ukuba afike, ikakhulukazi njengoba iNingizimu Afrika izokwedlulisela kwi-USA okuyiyona ezosingatha umhlangano weG20 olandelayo emuva kweNingizimu Afrika.
