UNGQONGQOSHE wezokuMbiwa kuleli uMnu uGwede Mantashe, uthi iNingizimu Afrika ngeke ibanjwe nguMengameli waseMelika, uMnu Donald Trump, ngobhongwana.
UMengameli uTrump, usabise ngokuthi uzoluhoxisa uxhaso izwe lakhe elilunika iNingizimu Afrika, ngoba kunabathile abathathelwa umhlaba wabo kuleli ngaphandle kwesinxephezelo.
Ekhuluma kwi-Africa Mining Indaba, eCape Town, uMnu uMantashe, uthe amazwe ase-Afrika anomhlaba onomnotho ngaphansi kwawo.
“Uma iMelika izohoxisa uxhaso, nathi ngeke sibanike umkhiqizo ombiwa phansi wamazwe ethu. Asiwona amazwe aphilela ukukhangezwa,” esho.
UMengameli uTrump, ubhale ekhasini lakhe iTruth Social Media, ukuthi eNingizimu Afrika, kuneqeqebana labantu elephucwa umhlaba, wathi alukho uxhaso azolunika lelizwe kuze kube kuphothulwa uphenyo ngalokhu.
Wesekwa nguMeluleki wakhe uMnu Elon Musk, ongusozimali futhi owazalelwa lapha eNingizimu Afrika. Ekhuluma nabezindaba uMengameli uTrump uthe, abaholi baseNingizimu Afrika, benza izinto ezihlasimulisa umzimba.
UMengameli uCyril Ramaphosa, usesho kaningi ukuthi i-Expropriation Act, akuhlosiwe ngayo ukuthathela abantu umhlaba, njengoba kunabathile abesaba ukuthi lo mthetho omusha uzokwenza leso esenzeka eZimbabwe, kuphangwa amapulazi abalimi abamhlophe.
menzi.jele@ilanganews.co.za
