KUZOKWENZEKA okungajwayelekile emcimbini we-gospel obizwa ngeMayine Gospel Exeperience ozoba seDCC Jesus Dome eMayville eThekwini ngomhla ka22 kuMay kophezulu.
Le ndumezulu yomcimbi ezoteketiswa ngeSilent Worship Expence: A Night of Song and Worship kuzokwenzeka okuzobe kuqala ukwenzeka emcimbini ye-gospel yakuleli njengoba bonke abazobe bewuhambele bazobe befake ama-earphone indumiso yabaculi beyilalele kuwona.
Kuzobe kuboshelwe izintandokazi zabaculi okubalwa kubo u-Oncemore Six, Khaya Mthethwa, Ncebakazi Msomi, Ntokozo Mbambo, Lusanda Beja noMpumi Mtsweni.
Omunye wabahleli balo mcimbi uKwezi Ndlovu Mbambo uthe kuzokwehluka kakhulu okuzobe kwenzeka kulo mcimbi njengoba bezoveza olunye uhlangothi kwezokuhlelwa kwemicimbi.
Uthe bonke abazobe bewuhambele bazonikwa ama-earphone nokuyiwona abazowashebenzisa ukulalela umculo.
Uthe lokhu bazobe bekwenza ngenhloso yokuthi umuntu nomuntu ozobe ekhona athole ukuxhumana noMdali ngendlela yakhe ngaphandle kokunaka omunye oseceleni kwakhe.
Uveze ukuthi lo mculi uzobe uhambisana nendumiso kanjalo nomkhuleko ngakho abazobe bewuhambele bazothola ithuba eliyingqayizivele lokuxhumana noNkulunkulu.
Unxuse abantu ukuba baphume ngobuningi futhi basheshe bawathenge amathikithi ukuze babe yingxenye yale ngqophamlando yomcimbi abazoba ngabokuqala eNingizimu Afrika ukuba emcimbini walolu hlobo.
Uthe amathikithi alo mcimbi aseqalile ukutholakala eWebtickets nasePick n Pay kusuekela ngo-R250.
