LUCKY CAIN
USEBENZE nasebezakhele igama emculweni umculi we-Afro-soul, uNdu Shezi (osesithombeni) osematheni kulezi zinsuku emuva kokuphuma kwe-albhamu yakhe yokuqala ethi “Isibusiso Sami”. Uthi isipiliyoni asithole ngokusebenza nabaculi abehlukene, okuhlanganisa neqembu lodumo, iJoyous Celebration, kumkhulisile emculweni futhi yikhona azokusebenzisa ukuzikhulisa kulo mkhakha.
Ekhuluma neLANGA Lempelasonto, uthe ngemuva kokukhipha ingoma yakhe yokuqala ngo-2018, ethi “Ngithanda Wena” ubone sekuyisikhathi sokunika abantu umsebenzi ogcwele, ozochaza kabanzi ngohambo lwakhe emculweni. Uthe yize abaculi abaningi sebeyekile ukukhipha ama-albhamu, yena ubone kufanele ukuthi anike abantu umsebenzi ogcwele.
“Beseziningi izingoma ebesengizenzile kusukela ngingenile emculweni, yingakho ngibone kufanele ukuba nginike abantu ukuze bazizwele,” kusho uNdu oveze ukuthi izingoma eziningi ezikule albhamu zikhuthazwe yimpilo yakhe nebanga aselihambile kuyona.
Uthe nakuba esethole isipiliyoni esanele emculweni, kodwa usafana nomculi osemusha njengoba esene-albhamu, ngoba yilapho eseqala ukubhekana khona nezingqinamba zokuzimela kulo mkhakha. “Nakuba zikhona izingqinamba kodwa ngihlalele ethembeni ngoba ngiyawethemba umsebenzi wami ukuthi usezingeni elifanele, futhi nginesiqiniseko sokuthi abantu bazowuthokozela,” kusho yena. Uthe kusukela iphumile i-albhamu yakhe, abantu bakhombisa ukuyamukela. Isiyatholakala kuzona zonke izinkundla zokuthengiswa komculo. Utshele leli phephandaba ukuthi usezinhlelweni zokuya eThekwini, ehambela izindawo ezidlala umculo bukhoma, ngenhloso yokuzwisa abantu amanoni awaqukethe kule albhamu yakhe. “Maduze ngizokhipha izinsuku zokuthi ngizobe ngikuphi ngaluphi usuku,” kusho le ntokazi eke yacula noProfessor engomeni eyashisa izikhotha, ethi “uNobenga”.
