ISAPHITHENE amakhanda imindeni yabayisithupha baseMabovini, eMsinga ngemuva kwesigameko sokumuka nomfula kwamalungu ayo, aphoseke nemoto emfuleni ebuya emsebenzini, esenezinsuku eziyisikhombisa eqashiwe epulazini eKranskop.
Kulesi sigameko esenzeke ngoLwesine ebusuku, kushone nowesifazane obezithwele, ngokusho komyeni wakhe. ILANGA elizifikele mathupha endaweni yesigameko, lifice umphakathi ubuthene eduze komfula uThukela, kukhona nesidumbu ebesimbozwe ngengubo eduze kwawo, nokuvele ukuthi ngesomunye wesifazane kwabamuke nomfula.
Abamukile nguNkz Nokwazi Ndlovu (28) obekhulelwe, nguNkz Gcinephi Chonco (43), nguNkz Zondekile Gumbi (48) obeyisangoma, nguMnu Mzwakhe Mdlalose (engatholakalanga iminyaka yakhe) okuqinisekisiwe ukuthi bashonile. Bese kuba nguMnu Sphamandla Ngobese (38) noMnu Nko-sinathi Msweli (42), okushaye isikhathi sokushicilela besathungathwa.
Kuthiwa bayisithupha abamuke nomfula iMfenebude, ephakela umfula iNadi bese iyongena oThukela. Kwabayisithupha abamukile kusatholakele abane abesebeshonile, ababili basathungathwa njengoba umphakathi wehla wenyuka nomfula. Abamukile ngabasezigodini ezimbili, okuyiNdaya nePhaku kuWard-12, naku-Ward 13.
Elandisa ILANGA uMnu Funakuphi Ndlovu (41) osinde kulesi sigameko, uthe bebeyishumi emotweni eyiveni ngesikhathi igugulwa wumfula ngabo 7 ebusuku ngoLwesine.
“Abakwaze ukuphuma ngesi-khathi imoto imuka nomfula, kube yimina newele lami uSabelo nomshayeli ubaba uMfanafuthi Ndlovu nobehleli eduze kwakhe, kwasala udadewethu omncane uNokwazi Ndlovu (28) nabanye abahlanu. Sizwe imoto isintanta emoyeni ngesikhathi iwela ibhuloho, ngavula isicabha esingemuva ngagxumela emanzini, newele lami langilandela. Siphuthume komunye umuzi oseduze, sabiza uSifiso Nsimangwe wakhona, sicela usizo.
“Sithe uma siphindela emfuleni sabona imoto isiyosithela ekhoneni lomfula. Sizamile ukugijima siya khona sahlangana nomshayeli ubaba uNdlovu nobehleli edu-ze kwakhe, okuyilapho sibone khona ukuthi basindile. Sijahe imoto sayifica isimile ekhoneni lomfula ingasenatende futhi kungasekho muntu kuyona. Okungiphathe kabuhlungu kakhulu ukuzwa omunye ongakwazanga ukuphuma ekhala, emuka nam-nzi,” kusho uNdlovu.
Imoto isale emfuleni igaxele ematsheni namanje ihleli khona. Bonke abashonile batholakale ezindaweni eziqhelelene begaxele ematsheni nasezihlahleni emfuleni iNadi. Umyeni kaNkz Nokwazi Ndlovu, uMnu Mandlenkosi Malinga, uthe ingoduso yakhe imshiye nezingane ezimbili okuyintombaza-ne (05) nomfana (02), kanti bebesanda kuthola ukuthi ikhulelwe ingane yesithathu.
Uthe ubone ngesiphika sesikibha sengoduso yakhe asithole sivele esihlabathini ukuthi mancane amathuba okuthi isaphila. Umfula obamukisile kuthiwa uhlala ungenamanzi kodwa abekhona ngesikhathi lina ngoLwesine. ILANGA lifike ngoMgqibelo usuwomile kungathi sekunesikhathi kwagcina ukuhamba amanzi kuwona.
IMeya yaseMsinga, uDkt Felinkosi Sikhakhane, ithe basahlela usizo abangalunika imindeni eshonelwe, kuyona yonke kuvela ukuthi akekho osebenzayo, aba-shonile bebesanda kuthola umsebenzi. Bonke kuthiwa bebeqashwe epulazini elilodwa ngosuku olufanayo.
