YETHULWE ngokunikelela izingane zendawo ngezicathulo zesikole inhlangano engenzi inzuzo kasopolitiki uMnu Zwakele Mncwango ongomholi weqembu i-ActionSA KwaZulu Natal futhi oyikhansela kuMasipala weTheku.
Lo sopolitiki odabuka KwaNongoma wethule le nhlangano yakhe ngokunikela ngezicathulo eziyikhulu kubafundi besikole eDlabe.
Uthe phakathi kwezinto inhlangano yakhe ezogxila kuzona wukusiza kakhulu ngasemkhakheni wezemfundo ikakhulukazi ukunikelela abafundi ngezinsiza abazidingayo ukuqhuba izifundo zabo ukuze baphumelele.
Uthe ukhethe ukuthi le nhlangano iqale ukusebenza ngakubo njengoba bekuhlale kumkhathaza ukubona izingane zihamba ngezinyawo ibanga elide ziya esikoleni zingazifakile izicathule.
“Nangesikhathi sobusika lapho kubanda khona ubuthola izingane zibhadazela zilibangise esikoleni. Lokhu bekungikhathaza kakhulu yingakho ngikhethe ukuthi ngiqale ngasekhaya ngaphambi kokuthi inhlangano idlulele kwezinye izindawo,” kusho uMncwwango.
Uthe kuyisifiso sakhe ukuthi zonke izingane zilingane esikoleni kungabi khona ebukeleka phansi noma ezizwa ibandululekile ngenxa yokuthi iqhamuka emndeni onjani.
Ukuvezile futhi inhlangano yakhe izosebenza kakhulu ezindaweni zasemakhaya ngoba inhloso wukuthi zithuthuke nazo ngezinsiza ezahlukene emphakathini.
Uthe inhlangano yakhe usazoyethula ngokusemthethweni sekuhambisana nezinhlelo zonke ezogxila kuzona.
“Ukusiza umphakathi bekuyinto ebengilokhu ngiyenza kodwa ngibone kungcono ukuthi ngiyenze ngendlela esemthethweni ukuze noma kukhona abaxhasi noma izinkampani ezizimele ezizimisele ukubambisana nathi zikwazi ukukwenza ngendlela evulelekile futhi eqondile,” esho.
