INHLOSO wukugcina umculo wesintu uphila kuMr Vee Sholo, ozakhele udumo ngezingoma ezithandwa kakhulu emicimbini yesintu.
Le nsizwa ogama layo langempela nguVuyisani Sholwa, izalelwe eMdantsane, eEast London. Itshele ILANGA ukuthi nakuba isiphumelele emculweni, kepha bekungesiyo into ekade igxilile kuyona.
“Ngagqugquzelwa yiwele lami ngoba sasidinga imali yokurejista enyuvesi, ukuba ngingene emculweni. Ngemuva kwalokho angibange ngisabheka emuva,” isho.
UMr Vee Sholo waziwa kakhulu ngezingoma zakhe okubalwa kuzo ethi, “Kuyabongwa”, “Akalali”, “Ngamamenemene”, “Ndiliyokoyoko” nezinye. Uqale ecula i-gospel, wakhipha i-album ngo-2012 esihloko sithi, “Rejoice in the Lord”, kwalandela ethi, “UYesu Uyabuya” ngo-2016, lapho ayecula khona noButho Vuthela noBetusile Mcinga.
Uthi ngesikhathi ebona izinto zikhanya, kuvele kwafika isikhathi seCovid-19. Ngaleso sikhathi ubengaculi kuphela kepha ubesebenza njengoba eneziqu zeBSc in Audiology (Honours).
“Ngangisebenza ngokuzimela njenge-audiologist, kodwa kuthe uma kulahleka (kuntshontshwa) izinto zokusebenza, kwama nse yonke nto. Ngaqala ngawasha izimoto zabantu, bangikhokhele, kwaba umsebenzi engiwuthatha njengebhizinisi.
“Khona lapho ngazifundisa i-graphic design, ngenza amakhadi emicimbi. Elinye lamakilayenti lacela ukuba kufakwe ingoma yesintu ekhadini layo, kwaba wukungena kwami emculweni wesintu,” kulandisa uMr Vee.
Emculweni wakhe uthi uhlanganise igwijo (izingoma ezijwayele ukuculwa emicimbini) nomculo we-gospel.
“Izingoma ozizwa emgidini noma emshadweni esikhule ngazo, yizo lezi engiziculayo. Inhloso enkulu ngalo mculo wukuthi, ngisho kungabe uphesheya kwezilwandle, kodwa ungabulahli ubuwena, nesizukulwane esizayo singayilahli into esiyiyo,” kuqhuba yena.
Echaza ngengoma emenze wathandwa ezinkundleni zokuxhumana ethi, “Kuyabongwa”.
“Le yingoma endala yesiZulu eculwa emcimbini, mina ngase ngifaka le ngxenye ethi ‘Mntanami kuyabongwa’. Ngangigcwele ukubonga enhlizweni yami, uma ngibuka engidlule kukho. Ingeyokugqugquzela abantu ukuthi kumele ubonge, ngisho kungabe kuncane kangakanani.”
Nyakenye uqokwe kwiSong of the Year kuMhlobo Wenene FM, lapho ephume khona indawo yesithathu ngamavoti. Kuwo lowo nyaka unqobe kumaSouth African Traditional Music Awards (Satma), kwiBest IsiXhosa Artist neSong of the Year. Uphinde waqokwa futhi kwiSong of the Year ngengoma ethi, “Malume” kuMhlobo Wenene FM kulo nyaka.
UMr Vee Sholo uthi inhloso enkulu wukuvela kubantu ezifundazweni ezahlukene, njengoba esekuqaphelile ukuthi umculo wakhe uthokozelwa iNingizimu Afrika yonke.
Echaza ngengoma ethi “Malume”, uthe: “Inkulu indima edlalwa ngomalume kepha enganakiwe, ngikholwa wukuthi ayibekwa ezingeni elifanele indima yabo. Le ngoma ingeyokubonga bona, nabo bazazi ukuthi babalulekile.”
Le nsizwa ithi ngaphezu komculo, isibuyelile ekusebenzeni njengodokotela wezindlebe.
“Imali engiyithole ngicula igwijo, ikwaze ukungithengela izinto zokusebenza, ngabuyela emsebenzi. Ngabuyela nasesikoleni. Ngenza unyaka wesibili kwiBachelor in Music eNyuvesi yaseFort Hare,” kuphetha yona.
