ISITHOMBE NGU: TOBIAS GINSBERG
UBENGATHEMBI ukuthi nguyena ngempela onqobe i-Absa Run Your City Tshwane 10k uKabelo Mulaudzi (27), oshaye intambo ebhincwe kanzima ngu-Aklilu Asfaw wase-Ethiopia, njengoba befike umkanye entanjeni kulo mjaho obungeSonto ekuseni eTshwane.
Bobabili laba basubathi baqede ngesikhathi esiwu-29:00 kulo mjaho obewungenelwe ngabagijimi abawu-10 000, abasukele phambi kwasezindlini zombuso, i-Union Buildings. Nakwabesifazane isicoco sisale eNingizimu Afrika kunqoba uGlenrose Xaba ngo-31:50.
Bekuqala emlandweni we-Absa Run Your City ukuthi abagijimi bafike umkanye entanjeni njengoba kwenzeke kuMulaudzi no-Asfaw, obewugijima okokuqala lo mjaho.
Ekhuluma emuva komjaho uMulaudzi, uthe: “Ngesikhathi ngiqeda umjaho, bengingenaso isiqiniseko sokuthi ngubani onqobile. Ngiqale ukushaywa wuvalo uma sengiqala ukuvulela ngesivinini sokugcina ngoba ubelokhu ephefumula eduze kwami (u-As-faw).
“Ngijabule ukunqoba ngoba nomndeni wami bewukhona ukuzobuka umjaho.”
Ngokunqoba kwabo, uMulaudzi noGlenrose – bobabili abagijimela iBoxer Athletics Club – bahlomule ngo-R30 000.
Ingxenye imiphumela ye-Absa Run Your City Tshwane 10k imi kanje, kwabesilisa: 1.Kabelo Mulaudzi (SA) 29:00, 2.Aklilu Asfaw (Ethiopia) 29:00, 3.Abdilmejid Mohammed (Ethiopia) 29:10, 4.Joseph Seutloali (Lesotho) 29:13, 5.Simon Sibeko (SA) 29:19, 6.Bennett Seloyi (SA) 29:22, 7.Pakiso Mthembu (SA) 29:32, 8.Namakoe Nkhasi (Lesotho) 29:37, 9.Chris Mhlanga (SA) 29:50, 10.Joel Mmone (SA) 29:55.
Kwabesifazane: 1.Glenrose Xaba (SA) 31:50, 2.Rebecca Mwangi (Kenya) 32:41, 3.Selam Gebre (Ethiopia) 33:05, 4.Karabo Mailula (SA) 33:40, 5.Irvette Van Zyl (SA) 33:41, 6.Karabo More (SA) 34:03, 7.Cacisile Sosibo (SA) 34:37, 8.Carina Swiegers (SA) 35:15, 9.Zanthe Taljaard (SA) 35:24, 10.Florence Nyaingiri (Kenya) 35:30.
