INTATHELI YELANGA
KUZOFANELE amincele umusa weKaizer Chiefs ne-Orlando Pirates umqeqeshi wamaJita (SA Under 20), uRaymond Mdaka ngabadlali bala makilabhu okubukeka bengaba wusizo olukhulu eqenjini lakhe elizogijima kwi-2025 Afcon Under 20 e-Egypt kusukela mhla ka-27 kwephezulu kuya kumhla ka-18 kuMay.
Laba badlali nguMfundo “Obrigado” Vilakazi noMbekezeli “TLB” Mbokazi. Kunongabazane ngalaba badlali nje, uMdaka – omemezele isikwati sabadlali abawu-21, azogijima ngabo lo mqhudelwano – uhlulekile wukuthola uChandre Campbell ogijima ophondweni lwesobunxele kwiClub Brugge yaseBelgium, ngenxa yokuthi le kilabhu ithe iyamdinga.
ISITHOMBE NGABE: BACKPAGEPIX
Amakilabhu kawaphoqelekile ukudedela abadlali bawo kulo mqhudelwano kwazise kawukho ngaphansi kwekhalenda leFifa, yize ubalulekile kwazise amazwe azodlala kuma-semi final awo azomela i-Afrika kwiFifa Under 20 World Cup eChile ngoSeptember, nonyaka.
Okubukeka kuzokwenza kube nzima ukuba iBucs idedele uMbokazi wukuthi izobe igijima umlenze wesibili weSemi final yeCaf Champions League nePyramids yase-Egypt mhla ka-25 kwephezulu, ekuhambeni, kanti kubukeka imdinga lo mdlali osezibekele indawo ezinhliziyweni zabathandi bale kilabhu. Ngaphandle kwalokho, izogijima owomkhaya neChiefs mhla ka-3 kuMay kube ngowamanqamu weNedbank Cup nazo iziMpofana mhla ka-10 kuyena uMay, eMoses Mabhida Stadium. Kakungabazeki ukuthi noVilakazi iChiefs izomdinga mhla ka-3 namhla ka-10.
ISITHOMBE NGABE: BACKPAGEPIX
“Isikwati sethu sibophele abadlali esiqale nabo amalungiselelo alo mqhudelwano, sagijima ngabo iCosafa Cup (eMozambique ngonyaka odlule). Bakhona nabebengekho eMozambique, okubalwa kubo uMfundo Vilakazi, u-Asekho Tiwane, uLangelihle Phili noSiviwe Nkwali. UChandre Campbell akekho ngenxa yokuthi ikilabhu yakhe ithe iyamdinga kwazise ilwela ukudla isicoco seligi,” kusho uMdaka.
Nokho bakhona abadlali abane acuphe ngabo uma kukhona abagcina bengabanga yingxenye yohambo lwase-Egypt; ongukuGabriel Amato, uThato Sibiya, Naledi Hlongwane noThato Mpati.
Lo mqhudelwano bekufanele ugijinyelwe e-Ivory Coast, kodwa leliya lizwe lahoxa ngemizuzu yokugcina. Kushintshe ngisho nendlela amaqoqo ami ngayo njengoba phambilini amaJita abeku-group B neMorocco, iNigeria ne-Egypt. Asefakwe ku-group B one-Egypt, iTanzania, iZambia neSierra Leone. Azovula ne-Egypt mhla ka-27.
Selilonke iqembu likaMdaka, limi kanje:-
ONOZINTI: Fletcher Lowe-Smythe (Estoril, Portugal), Takalani Mazhamba (Chiefs) noKgoleng Ratisani (Sekhukhune United)
IZITOBHA: Mbekezeli Mbokazi (Pirates), Gopolang Taunyana (Chiefs), Tylon Smith (Stellenbosch), Sifiso Timba (Chiefs), Asekho Tiwani (Sundowns), Siviwe Nkwali (Cape Town Spurs) noNeo Rapoo (SuperSport United)
ABASESISWINI: Gomolemo Kekana (Sundowns), Patrick Autata (Cape Town City), Lazola Maku (SuperSport United), Mfundo Vilakazi (Chiefs), Faiz Abrahams (Stellenbosch), Langelihle Phili (Stellenbosch), Shakeel April (Cape Town City) noKutlwano Lethlaku (Sundowns)
FORWARDS: Jody Ah Shene (Cape Town City), Thabang Mahlangu (SuperSport United) noKgomotso Modiba (Stars of Africa)
