UMNYANGO wezeMidlalo KwaZulu Natal oholwa nguMntomuhle Khwawula ubeke imiklomelo econsisa amathe ezotholwa ngabasubathi basifundazwe abazokwenza kahle kwiComrades Marathon ezokuba ngeSonto isukela eMgungundlovu isongwe eThekwini.
Umsubathi wokuqala waKwaZulu-Natal uzohlomula ngo-R60 000 kuthi owesibili kube wu-R40 000 no-R20 000 kozongena endaweni yesithathu.
Abasubathi abazothola lo mklomelo kufanele bangene kwi-top 30.
Phakathi kwabasubathi ababhekiwe ukuba bahlomule ngalo mklomelo nguBongumusa Mthembu ongene nabokuqala abalishumi nyakenye. Kube ngu-Ayanda Ngcobo ongene isibili kwiPrince Mangosuthu Ultra Marathon, uSinethemba Tshangase onqobe iHarry Gwala Marathon neminye, uSkhumbuzo Seme, uLindelani Mjwara ukubala nje abambalwa.
Kwabesifazane kubhekwe uJenet Mbhele ongene nabokuqala abalishumi nyakenye.
UJenet nguye othwele ngeqoma kwabesifazane njengoba engene nabokuqala abayishumi iminyaka emibili ilandelana. Omunye obhekiwe nguJenna Challenor, uJanie Grundling, uFikile Mbuthuma ukubala nje abambalwa.
UThabo Mofokeng okhulumela uMnyango uthe abasubathi abazothola lo mklomelo kufanele bangene nabokuqala abawu-30. Uthi inhloso yoMnyango ukubagqugquzela ukuba benze izikhathi ezinhle kulo mjaho.
