LINDA XIMBA
UHLOMA ngezifundo zobumeli umculi we-gospel osafufusa ngoba ethi wenzela ukungazitholi esexhaphazeka kule ndima kwazise ulubonile usizi olubhekane nabanye abaculi phambilini. UPinky Majola (42) (osesithombeni) waseLusikisiki, e-Eastern Cape – odume ngelikaQhawekazi esteji – uzokwethula i-albhamu yakhe yokuqala enezingoma eziwu-10, ethi “Rebuilding the Walls” mhla ka-30 kwephuzulu e-Ethekwini Community Church (ECC) kamBhishobhi uVusi Dube.
Le albhamu yelanywa yi-EP okukhona kuyona ingoma ethi “Igama Elihle” nethi “Before the Foundation”, ezidlalwa kakhulu emisakazweni yomphakathi naseziteshini ezinkulu KwaZulu-Natal naseGoli. “Kule albhamu ngigqugquzela abantu ukuba bavuke bazithathe uma kade bewile,” esho.
Ubonge ukwesekwa ngozakwabo abafike ngaphambi kwakhe endimeni yomculo, nabo abazonandisa kulo mcimbi. “Ngimema abazalwane ukuba baphume ngobuningi babo ngoba bazobhema bakholwe. Abaculi abazongeseka kulo mcimbi nguPutuma Tiso, uHope Lalami, uTsego Diango noLungelo Hlongwane,” kusho uQhawekazi.
Ngaphandle komculo nezifundo zobumeli, uQhawekazi usanda kusungula iQhawekazi Record Label athi uhlose ukuvumbulula ngayo amakhono kubaculi abafufusayo. Uthe amathikithi omcimbi atholala eWebtickets kwaPick n Pay kanti aqala ku-R200 kuya ku-R300.
