UQOPHE umlando umculi we-gospel uXolly Mncwango ngokudayiswa ubuthaphuthaphu kwamathikithi omcimbi wakhe, iThe Unusual Encounter ozoba seNkosi Albert Luthuli International Convention Center (ICC) emumatha abantu abawu-12 000, waze waphoqeleka ukuba avule usuku lwesibili.
Le ntokazi izakhele ugazi ngesikhathi iqala ukubonakala kwiJoyos Celebration eminyakeni eyedlule, kusukela lapho itshengise ukukhula kulo mkhakha. Echaza ngokudayisa kwamathikithi uthe: “Ngizizwa ngithobekile kakhulu ngendlela abantu abangitshengise uthando ngayo. Ngijabule ngendlela engingakwazi nokuyichaza, ukuthola ukusekwa ngale ndlela esifundazweni sakithi kwenza ngithobeke,” esho.
Uthi amathikithi osuku lokuqala aphela ezinsukwini eziwu 7 eqalile ukudayisa, abantu ezinkundleni zokuxhumana bamncenga ukuba avule usuku lwesibili. Uthi nawo asedayise u-75% wamathikithi osuku lwesibili. “Ngangizitshele ukuthi ngizomaketha umcimbi kakhulu kepha ngagcina ngingasakwenzanga lokho wazidayisa wona, abantu bakhuluma nangawo ezinkundleni zokuxhumana,” kuchaza uXolly.
“Ngiyakubonga ukuthi uNkulunkulu usebenzise mina ukuqopha umlando omuhle kangaka. Ngifisa singamaciko e-gospel siphakamisane njengoba kwenzeka nakumaskandi. Uma kuphumelela oyedwa lokho kusho ukuthi siphumelele sonke, kumele sijabulelane. Izinto zikaThixo kazichazeki, ngiswele amazwi okuchaza injabulo enginayo. Ngifisa noma ngubani olahlekelwa yithemba, abuke mina bese ezwa libuya ngoba uJehova ungiphakamisile,” esho.
UXolly waziwa kakhulu ngezingoma ezithi Liyabasebenzela, Be Lifte, Yebo Nkosi, Ngiyamazi uMhlengi Wami nezinye.
tzondi@ilanganews.co.za
