INTATHELI YELANGA
UMQEQESHI weqembu lesizwe laseBotswana, uMorena Ramoreboli, uveza okwenza umqeqeshi weBafana Bafana, uHugo Broos, ancamele umdlali we-Orlando Pirates, u-Evidence Makgopa kunoLebo Mothiba weMamelodi Sundowns.
Kuzokhumbuleka ukuthi uRamoreboli – ongowaseNingizimu Afrika – uke wasebenza noBroos ekuqokeni iqembu leBafana elisuke lizoqala imidlalo, kanti uke wayibamba futhi kwelakuleli eligijima iCosafa Cup.
Uthi empeleni uBroos uyazifela ngoMothiba, kodwa ngenxa yokuthi ukhuhla ibhentshi kwiDowns, kunzima ukumbizela eqenjini lesizwe.
“Uma ubheka, iBafana ithola igoli ngebhola elisuke liphaswe ngomunye umdlali, emabholeni agotshiwe (crosses) noma emnyakazweni osuke uhlanganiswe ngamaphasi amaningi, ngoba yilona isu uBroos agadla ngalo,” kusho uRamoreboli engxoxweni abe naai neSAFJA.
“Omunye wabadlali abamchazayo, nguMothiba ngoba (uBroos) uyakholewa kumgadli owu-9, okulula kozakwabo ukwakhela kuyena iminyakazo yokuqoba izitha. Yingakho ngihlale ngitshela abantu ukuthi impela uMakgopa akajwayele ukushaya amagoli, kodwa iqembu lakhela kuyena uma lidlala. Leyo ngenye yezinto engazifunda kuBroos uma echaza uhlobo lwabadlali abadingayo,” esho.
NGU-EVIDENCE Makgopa wePirates enomqeqeshi weBafana, uBroos. IZITHOMBE NGABE: BACKPAGEPIX
Kuzokhumbuleka ukuthi emidlalweni yokugcina yokuhlungela iNdebe yoMhlaba yeFifa ka-2026, iBafana ilinyalelwe nguLyle Foster, yalanda uMakgopa obengekho eqenjini.
Ufike washaya igoli lesithathu ngesikhathi iBafana ibhudluza iRwanda ngo-3-0 eMbombela kowokugcina wokuhlungela indebe yomhlaba, ngenyanga edlule.
NGOMORENA Ramoreboli ongumqeqeshi weBotswana.
UMothiba – oke wahlala isikhathi eside engadlali ngenxa yokulimala – yize ekhombise ukuba bukhali ngesikhathi ethola ithuba lokudlala kwiDowns ngesikhathi iyingxenye yeFifa Club World Cup nonyaka, nokho isikimu usizwa ngendaba njengoba umqeqeshi weDowns, uMiguel Cardoso emdlisa ama-ayisi noma amjikijele ezihlweleni.
