INTATHELI YELANGA
UMQEQESHI wonozinti beKaizer Chiefs, u-Ilyes Mzoughi, ukholwa wukuthi abalandeli beziMpofana babagxeke kakhulu onozinti bale kilabhu ngesizini edlule; okunguBruce Bvuma, uBrandon Petersen noFiacre Ntwari – olandwe kwiTS Galaxy ngesizini eyandulela eyedlule, ethwelwe ngeqoma. Nokho, emuva kwemidlalo embalwa esezintini, uphenduke iqaqa kubathandi beziMpofana.
“Sibe nesizini enzima, hhayi nje konozinti kuphela, eqenjini lilonke. Sibe neshwa lokulinyalelwa ngabadlali, nokumiswa kwezitobha zethu, okushaye kakhulu onozinti (kwazise kuvuleke imbobo emuva) neqembu jikelele,” kusho lo mqeqeshi kwi-website yeChiefs.
KUSUKA kwesobunxele nguFiacre Ntwari, nguBruce Bvuma, ngu-Ilyes Mzoughi – ongumqeqeshi walabo nozinti – noBrandon Petersen. ISITHOMBE NGABE: BACKPAGEPIX
Uqhube ngokuncoma unozinti ngamunye. “Uma sibheka, bonke onozinti bethu kukhona okuhle abakwenzile kule sizini ephelile. Isibonelo, kunebhola elibi elivinjwe nguBvuma sibhekene neMamelodi Sundowns kwiSemi final yeNedbank Cup, nendlela uBrandon adlale ngayo ngokuzimisela kowamanqamu (abadle kuwona i-Orlando Pirates ngo-2-1),” esho.
Uqhube ngokuvuma ingcindezi ephezu kwabadlali ngokugqoka ijezi leziMpofana, wabe esenxusa abalandeli ukuba babeseke. “Abalandeli bethu bahlale befuna imiphumela emihle, futhi ngiyavuma, kufanele kube njalo, kwazise siyikilabhu enkulu. Kodwa ngicabanga ukuthi babuye babagxeke kakhulu onozinti bethu. Izinto kumele sizibuke ngeso elijulile, sibeseke. Kubalulekile ukuba abalandeli bethu bakhombise uthando konozinti bethu, kungakhathalekile ukuthi yimuphi onikwe ijezi, kwazise phela siwumndeni,” ephetha.
