SIKHULU isililo endimeni kanobhutshuzwayo ngokudlula emhlabeni kukaTendai Ndoro (40), wodumo kwi-Orlando Pirates, iHighlands Park ne-Ajax Cape Town.
Lo mgadli udlule emhlabeni izolo ngoMsombuluko, kanti ibingakaziwa imbangela yokufa kwakhe. Kubikwa ukuthi utholakale esethule lapho abehlala khona eGoli.
IPirates idlulise amazwi enduduzo ezihlotsheni nakulabo abebesondelene nalo mdlali.
“Siyi-Orlando Pirates sidlulisa amazwi enduduzo emndenini, kubangani nakubo bonke abebesondelene nalo mdlali, njengoba bebhekene nesikhathi esinzima kangaka,” kusho isitatimende sale kilabhu.
Ingena ilakanyana imiyalezo yokubhonga emswanini ngoNdoro, ikakhulu ezinkundleni zokuxhumana.
UNdolo udlale imidlalo ewu-112 kweziMnyama, newu-14 egijimela izwe lakhe iZimbabwe. Ubeke amakhokho emgibeni ngo-2020, ngenxa yokugula.
