UMQEQESHI weMamelodi Sundowns uMiguel Cardoso ubalise ngamathuba abawayekile bedla ngo-1-0 iStellenbosch FC koweBetway Premiership eDHL Stadium eKapa izolo ngoLwesithathu ebusuku.
Igoli leDowns livalelwe enethini ngu-Igraam Rayners, oyijoyine ngaphambi kokuqala kwesizini, esuka kuyona iStellies.
“Ngicabanga ukuthi bekumele ziye ekhefini sihamba phambili ngamagoli amabili nangaphezulu. Sakhe inqwaba yamathuba alula obekumele siwasebenzise. Kodwa-ke okubalilekile wukuthi sikwazile ukuvala emuva. Bekubalulekile ukunqoba lo mdlalo,” esho.
Uncome indlela abadlali abazinikela ngayo ukusebenzela ikilabhu, nendlela abasibambe ngayo isitayela sakhe, ikakhulu laba abebengalitholi kakhulu ijezi phambilini.
Umqeqeshi weStellies uSteve Barker uvumile ukuthi ezakhe bezihubha izithunzi ngesiwombe sokuqala, wathi kodwa bekumele balithole igoli lokulinganisa esiwombeni sesibili.
“Abadlali esibafakile basisizile, sakwazi ukuthwala umdlalo. Bese sibacindezela, kodwa unozinti wabo uDennis Onyango wabavikela,” kusho uBarker.
