UKHUTHAZA inhlanzeko nobunye kubafundi bezikole ezahlukene umsakazi wesiteshi somphakathi iNongoma FM.
UNqubeko Ndlela, oshayela uhlelo lwasekuseni kulo msakazo aphinde aqhube uhlelo lwezenkolo ngoMgqibelo, uqale umkhankaso wukugqugquzela ukwazisana kubafundi bezikole ezahlukene. Usungule umncintiswano obizwa ngeNgezo Yezikole.
Ekhuluma neLANGA, uthe ngalo mkhankaso uhlose ukuthi kube nokuzwana kubafundi ukuze kuzogwemeka izimpi ezihlala ngokuqubuka minyaka yonke. Kuyaye kuqubuke izimpi zabafundi, ezigcina sezingenelwa nangamalungu emiphakathi.
“Umcimbi wethu wokuqala ebesinawo ngoMgqibelo uthole ukwesekwa okukhulu. UMnyango wezeMfundo uwemukele waphinde waba yingxenye yawo. Umasipala wendawo usamukele, waphinde wabambisana nathi kwezinye zezinhlelo.
“Ngifisa ukuthi izikole zibe nobudlelwano obuhle. Isikole ngasinye besithumela oswenka baso abawu-15. Isifiso sami esikhulu ngesokuba kubuyiswe ubunye kubafundi. Ngiyafisa nokuba ngibonge kubona bonke abafake isandla ukuze lo mcimbi ube yimpumelelo,” kusho uNdlela.
