UZIMISELE ngokuhoxa kumabonakude, angene ngokugcwele kwezepolitiki uma eseqala imikhankaso yakhe uXolani Khumalo, omenyezelwe njengozomela i-ActionSA esikhundleni sokuba imeya Ekurhuleni okhethweni lohulumeni basekhaya, ngonyaka ozayo.
UKhumalo wodumo lohlelo lokuthungatha izidakamizwa, iSizok’thola, kwiMoja Love, wethulwe ngoMgqibelo yileli qembu phambi kwamalungu alo. Ekhuluma neLANGA ngesinqumo sokungena kwipolitiki, uveze ukuthi unxenxwe nguMnu Herman Mashaba ongumsunguli we-ActionSA ngemuva komhlangano wabo mayelana noxhaso ayelucelile.
“Ezinyangeni ezintathu ezedlule, ngibe nomhlangano nobaba uMashaba ngenhloso yokuthola uxhaso lwenhlangano yami engayenzi inzuzo, esiza abahaqwe yizidakamizwa. Kulo mhlangano uMashaba wangibuza ukuthi ngizimisele yini ukusebenzela umphakathi ngokugcwele? Ngavuma ngoba yiyona into esenhliziyweni yami,” kusho uKhumalo.
Uthi uMashaba waveza ukuthi uzomeseka kulokhu ngokuthi amenze amele iqembu lakhe esikhundleni sobumeya.
“Ngalijabulela leli thuba ngoba ngiyakuthanda ukusiza umphakathi, ukuqinisekisa ukuphepha kwawo nokuthi uthole konke okuwufanele kuhulumeni,” esho.
Uveze ukuthi kungaleso sizathu ethathe isinqumo sokujoyina leli qembu ngokugcwele. Uthe okwamanje akukho okumvimbayo ukuba aqhubeke nohlelo lwakhe kumabonakude, kodwa uma eseqala ukukhankasa, uzohoxa. Uthe ukulwa nobugebengu kuzoba seqhulwini kuyena.
“Ngizobeka phambili ukulwa nayo yonke inhlobo yobugebengu ethinta inkohlakalo, izidakamizwa, ukuntshontshwa kwezimoto, ukubanjwa kwenkunzi nokunye.
Khonamanjalo, kulindeleke ukuba maduze leli qembu limemezele igama likaMnu Zwakele Mncwango njengozolimela kwesobumeya kuMasipala weTheku, okhethweni lwangonyaka ozayo. UMncwango nguyena ohola leli qembu esifundazweni, kanti uyikhansela kuwona lo masipala obalwa neminye emikhulu kuleli.
