QHUDE manikiniki zindala zonke emjahweni wokuhola uMasipala weTheku ebuholini be-ANC kulandela ukuthi leli qembu limemezele abasethubeni lokuba yiMeya yalo masipala omkhulu KwaZulu Natal.
UNobhala Jikelele we-ANC uMnu Fikile Mbalula emcimbini ose-Sandton Convention Centre eGoli umemezele uMnu Cyril Xaba, Maggy Govender, Thabani Nyawose, Nkk Nomusa Dube Nube noNkz Mina Lesoma njengalabo abazoba sethubeni lokuqhoqhobala isikhundla sobumeya kulo masipala uma leli qembu lithola amavoti anele okhethweni lohulumeni basekhaya oluzoba ngomhla ka-4 ngoLwezi nonyaka.
UMbalula ophinde wamemezela nabanye komasipala abahlukene kuleli uveze ukuthi kuzokhethwa oyedwa kulaba abamenyezeliwe komasipala.
Uqhube ngokuthi okuzoba yibo ngempela abazoba yizimeya ngokusemthethweni bazomenyezelwa ngenyanga ezayo.
UMbalula uthe bonke abamenyezeliwe ngokuba sethubeni kuzomele bakhankasele leli qembu babonakale emphakathini bezibophezela ukuwusebenzeleni.
Utshele abezindaba ukuthi lolu hlu lwamagama abawamemezelile bababenzile izinhlolokhoni futhi bagculiseka ngokuphendula kwabo.
Uthe kulolu hlu kukhona izifundiswa, osomabhizinisi, abezinyunyana nabanye abaqukethe iziqu ezifanele ukuhola omasiapala.
Kulo mcimbi abanye abamenyezeliwe ukumela omasipala abahlukene KwaZulu Natal abakwazanga ukuba yingxenye yalo mcimbi.
UMbalula uthe lokhu kudalwa yizinkinga zezinhlelo zokuza kwabo eGoli. Phakathi kwabanye abamenyezeliwe kodwa abangafikanga kubalwa uMfu Vusi Dube noMnu Mzi Thebola eMsunduzi, nabanye bakomasipala KwaDukuza, uMhlathuze, Newcastle nabanye.
UMbalula uthe laba abazomela i-ANC kwesobuMeya baphathiswe izinto ezimqoka eziseqhulwini okumele basebenzele phezu kwazo.
Uthe phakathi kokuseqhulwini kubalwa wukuqinisekisa ukusatshalaliswa kwamanzi, ukuba khona kogesi ongacishi, wukwakha amathuba emisebenzi, wukuqinisekisa ukuqoqwa kwemfucuza, ukwakha umasipala ophephile nokuqinisekisa imiphumela kamcwaningi mabhuku ongenacobho nokunye okuhambisana nokuphathwa kukamasipala ngobuqotho.
