SEKUBOSHWE abasolwa ababili ecaleni lokusocongwa komholi we-IFP, uMnu Khethamabala Petros “KP” Sithole.
Lokhu kuqinisekiswe ngokhulumela iSAPS kuzwelonke uBrigadier Athlenda Mathe.
UBrigadier Mathe uveze ukuthi laba basolwa bazovela khona namhlanje ngoLwesine eNkantolo yeMantshi ePalm Ridge, eGoli, ngecala lokubulala.
UMnu Sithole wadutshulwa wabulawa ngoMgqibelo, eKatlehong, eGoli. Wahlaselwa esemhlanganweni weqembu obukhona eKatlehong.
Ubulawa nje ubeyisekela likasotshwebhu we-IFP ePhalamende likazwelonke, kanti wake waba wusihlalo we-IFP eGauteng.
UMnu Sithole uzofihlwa ngeSonto, eNkandla, kanti namhlanje ngoLwesine kunenkonzo yesikhumbuzo ezoba seGermiston Civic Centre, Ekurhuleni, kusukela ngehora lesithathu ntambama.
