UGCWELE ukuzethemba ukaputeni weSpar Proteas okuyiqembu lesizwe leNetball uKhanyisa Chawane ukuthi bazokwenza kahle emdlalweni ewuchungechunge ne-England yeSpar Challenge Netball Series ezoqala ngoLwesine isongwe ngoMgqibelo e-Ellis Park Arena, eGoli.
Le midlalo iProteas eyizingqwele ze-African Championships ngeyokuzihlola njengoba izilungiselela amaCommonwealth Games azoqala mhla ka-23 kuJuly asongwe mhla ka-2 ku-August eGlascow, eScotland.
ISouth Afrika izogadulisana emidlalweni emithathu ne-England Roses kanti yonke le midlalo izobhulelwa amazolo iqembu labesilisa.
UKhanyisa ekhuluma nabezindaba ngaphambi kwalo mdlalo uthe: “Siwulindele ngabomvu lo mdlalo ne-England. Ngeke ube nzima okubalulekile ukuba sizethembe singabadlali. Iqembu lethu lihle kakhulu lakhiwe ngabadlali abanesipiliyoni futhi abakulangazelele ukunqoba.
“Sike sayishaya i-England phambilini, inkinga yethu ukuthi uma siyishayile siye singakholwa kwathina. Lo mdlalo siwulungiselele ngokweqophelo eliphezulu kangingabazi ukuthi sizowunqoba.
“I-England izosisiza ukuba sikwazi ukuzibona ukuthi simiphi njengoba siya emidlalweni yamaCommonwealth Games. Okuhle ukuthi siya kulo mqhudelwano sizilungiselele kakhulu. Sike sadlala ne-Australia, iNew Zealand kuningi esikufundile kule midlalo esiphuma kuyona. Isisizile ukuba sizibone ukuthi yilaphi lapho sibuthaka khona.”
ISouth Africa ilele unombolo 5 emhlabeni ilandela e-England kube iJamaica, iNew Zealand ne-Australia ehlezi phezulu.
IProteas izokube imelwe ngabadlali ababili besifundazwe okuwuThulisile Maduna noNozipho Ntshangase.
Selilonke iqembu lesifundazwe limi kanje elizodudulana ne-England limi kanje: uKhanyisa Chawane (c), uKyla Dames, uJamie Golob, uThulisile Maduna, uKamogelo Maseko, uTarle Mathe, u-Owethu Ngubane, uRefiloe Nketsa, uNozipho Ntshangase, uNicola Smith, uRolene Streutker, uElmeré van der Berg, uTinita van Dyk, uJuanita van Tonder noSanmarie Visser.
Elabesilisa: USicelo Gamede, uShane Labuschagne, uLutendo Maiwashe, u-Edward Manyathela, uNjabulo Nekhavhambe, uRomeo Ngcaku, uLwazi Nzama, uGavin Peters, u-Eugene Sinxezi, uKwandile Sithole, uSbongakonke Vava, uVukile Zulu, uWandile Gumede, uJaun van den Heever, uSandiso Zulu, u-Itumeleng Mahanoe, uWilliam Lethoko noKatleho Rotobane.
