ISHIYE kukhalwa ezingxenyeni ezahlukene zaKwaZulu-Natal imvula eqale ukuyidliva ngoLwesibili kwaze kwaba wubusuku bangoLwesithathu.
ILANGA lithole ukuthi bayisihlanu abantu abaphangalele ngenxa yalesi simo. Izimvula zicekele phansi izakhiwo okuhlala kuzona abantu okubalwa kuzo nemijondolo.
Ngokwesitatimende esikhishwe wuMasipala weTheku, kuvela ukuthi bawu-4 abantu abashonile ezindaweni ezahlukene ezingaphansi kweTheku. Phakathi kwabo kubalwa owesilisa oneminyaka ewu-45 okuvele ukuthi ucindezelwe wudonga lwendlu abekuyona ngesikhathi kwenzeka umonakalo. Umfana oneminyaka ewu-13 waseFolweni namantombazane amabili aneminyaka ephakathi kuka-12 no-13 eyodwa eyaseDamat noyedwa waseNsimbini khona eThekwini.
Izigameko eziningi zenzeke engxenyeni engaseNingizimu yeTheku. Ngenxa yalesi simo kuvalwe amabhishi ambalwa ngenhloso yokuvikela izakhamizi ezifweni okungenzeka zidalwe yizikhukhula. Kwezinye izindawo kube nenkinga yezihlahla eziwele emigwaqweni. Phakathi kwalezo zindawo kubalwa iMorningside, iChatsworth, uMkhomazi kanye naseVerulam.
“Kunxuswa abashayeli bezimoto ukuba baqaphele kuzona zonke izindawo. Umkhandlu unxusa ukuba zingavalwa izikhungo zezempilo ngenhloso yokuba zikwazi ukunikezela ngosizo oludingwa wumphakathi,” kusho isitatimende.
INGXENYE yomonakalo odalwe yizimvula ezinamandla eThekwini. IZITHOMBE: ZITHUNYELWE.
