KULINDELEKE ukuthi itheleke kuleli sonto elizoqala imizimba yamasosha aseNingizimu Afrika abulawa ngesikhathi etholana phezulu namavukelambuso e-M23 Democratic Repablic Of Congo ngokusho kwe-SANDF.
La masosha abejutshwe yi-South African Development Community ukuba ayiba yingxenye yokugcina ukuthila empini eqhubeka kuleli yazwe.
Ngokusho kwe-SABC okhulumela iSANDF uSiphiwe Dlamini uthe imizimba yala masosha izobuyela eNingizimu Afrika uma lonke uhlelo lokubuyiselwa kwabo seliphothiliwe e-Uganda.
UDlamini ucashunwe ethi imizimba yala masosha yathathwa yahanjiswa Entebbe e-Uganda ukuze kuqale uhlelo lokuhlonzwa kwezidumbu.
“Lolu hlelo kubhekwe ukuthi luphothulwe ngoLwesibili,” kusho uDlamini eveza ukuthi bazoqhubeka nokwazisa abantu bakuleli ngokuzokwenzeka kusukela ngoLwesibili.
Khonamanjalo ngoMsombuluko kulindeleke ukuthi kube nenkulumongxoxo ePhalamende likazwelonke mayelana nokubulawa kwala masosha awu-14.
Kule nkumongxoxo eyisipesheli kulindeleke ukuthi wonke amalungu eKhabhinethi kaMnu Cyril Ramaphosa abeyingxenye yalo mhlangano.
Kuzokhumbuleka ukuthi ngesikhathi umengameli Ramphosa ethula inkulumo yesizwe wamemezela ukuthi ama-flag akuleli mawehliswe aphephezeliswe phansi ngenhloso yokuhlonipha la masosha.
