LUZOLALELWA eNkantolo yesizwe saseMalangeni, eNewcastle, udaba lombango wethempeli eliseMafahlawana (eNewcastle), oqubuke ekuqaleni kwesonto phakathi kwezinhlangothi ezimbili, okungolwaseKuphakameni nolwaseBuhleni.
Kudonsisana amaNazaretha ohlangothi lwaseKuphakameni oluhlolwa yiNkosi uVukile “Ncoyincoyi” Shembe, nolwaseBuhleni, oluholwa yiNkosi uMduduzi “Nyazilwezulu” Shembe. Zombili izinhlangothi zithi leli thempeli lakhiwe endaweni yazo.
ILANGA lithole i-video eveza abazalwane balezi zinhlangothi, bebanga behliphiza amatshe amhlophe okubiyelwe ngawo ithempeli. Kuyona le video, kubonakala abesilisa bephoqa abanye ukuba bakhiphe wonke amatshe ebese bewafakile, belungiselela ukuwacaka abemhlophe njengokosiko lwaleli bandla.
Bazwakala benqakisana ngamagama, bememezana bethi: “Akathole indawo yakhe, hhayi le yoNyazi. UShembe onjani lo onkashelayo? Nidla izindawo zoNyazi, zonke izinkalo. Yakhani izinto zenu.”
ILANGA likhulume neNkosi uMadoda Nkosi, oluzolalelwa enkantolo yayo lolu daba, ethe selufikile ezithebeni zayo.
Ithe: “Kade sixoxa nondunankulu ngalolu daba, savumelana ngokuthi izinhlangothi zombili mazifike lapha (namhlanje ngoLwesine) ukuze ngizwe ukuthi bakhala ngani. Angizazi izimpi zabo, kodwa engikwaziyo wukuthi uhlangothi lwaseKuphakameni, lwayikhonzela kuqala leya ndawo eNkosini uJames, eseyakhothama.
“Ngibabizile ngathi mabafike la, ngoba ngifisa ukubazi. Le ndawo kade bayikhonzela, induna ebaphethe ike yafika izobika udaba lwabo ukuthi sebezoqala ukukhonza, kanti sekuzoba nalo mbango. Ngizozama ukuxoxisana nabo bonke ngoba bangabantu, kumele baluthole usizo.”
Ngokuthola kweLANGA abohlangothi lweNcoyi- ncoyi bebelungiselela umcimbi wokubusiswa kwaleli thempeli obuzoba ngeSabatha, njengoba lingakaze livulwe ngokusemthethweni. UMnu Thetha Ngiba okhulumela uhlangothi lwaseKuphakameni uthe inkosi (iNcoyincoyi) isibikelwe ngalesi sehlakalo. Ukhomba induna yendawo ngenjumbane ukuthi yiyona esuse umsindo.
“Kufike induna ngoNhlolanja (Febuary) kukhonzwa ethempelini, yafike yashutha izithombe, yabuza amalungu ebandla ukuthi angobani ngoba yona ayiwazi. Ngemuva kwenkonzo ahambile ayoyichazela ukuthi indawo ayithenga enduneni eseyakhothama. Yithempeli lethu elisha leli, inkosi ibiqoke abefundisi ukuba bayolibusisa ngeSabatha leli lakusasa. Bayaziwa abantu abahlasela ukuthi baqhamuka ngasohlangothini lwaseBuhleni.
“Bafike lapha basiphula amatshe, bawatshinga le kude. Lokhu sikubona njengokuchukuluzwa ngoba wonke umuntu unelungelo lokukhonza lapho ethanda khona. Noma sekunje, kodwa inkonzo yokuyobusisa ithempeli ehlelwelwe iSabatha, izoqhubeka,” kusho uNgiba.
Okhulumela uhlangothi lwaseBuhleni uMnu Thokozani Mncwabe ubagxekile abahlasele ithempeli.
“Angikholwa wukuthi amaNazaretha aseBuhleni lawa enze into embi kanje. Abantu nje laba abaphume umkhankaso wokudicilela phansi isithunzi soNyazi. Uma abantu indawo beyinikwe yinduna noma yinkosi, asikho isidingo sokuthi baphazanyiswe,” esho.
