SIGCINE sitholakele isidumbu somfana oneminyaka ewu-7 ubudala waseCator Manor uSqalo Phumelela Ntlooa.
Ngokubika kweReaction Unit South Africa isidumbu sikaSqalo sitholakale ngoMsombuluko ngemuva kokuba enyamalale eyozingela nabanye abangani bakhe abathathu.
USqalo obefunda u-grade 2 eNsimbini Primary School wanyamalala ngeSonto ehamba nabangani bakhe nezinja eyozingela ehlathini iCator Manor Forest.
Ngemuva kokubikwa ngokunyamalala kwakhe iRUSA ijube indiza yayo enophephela emhlane ukuba iyomthungatha.
Kuvela ukuthi ngemuva kwamahora amathathu nengxenye ethungathwa kube sekubonakala izimpahla zakhe onqanqameni lomfula oseduzane nokuyilapho kugcine kubhekwa khona emfuleni.
Kubikwa isidumbu sakhe sitholwe ilungu lomphakathi singaphakathi emfuleni.
