USIHOXISILE isiphakamiso ayesenzile ngoNdasa (March) uNgqongqoshe wezeMali, uMnu Enoch Godongwana, sokuba kwandiswe izinhlobo zokudla abathengi abangakhokhishwa kuzo intela ebizwa nge-value added tax (VAT) ezitolo.
UGodongwana uveze ukuhoxiswa kwalesi siphakamiso ngoLwesithathu ngesikhathi ethula isabelomali sanonyaka. Lesi sabelomali sesethulwa isithathu emuva kokuba kwabhuntsha isabelomali ayezosethula ngoNhlolanja (February), kwaphinde kwahoxiswa isabelomali asethule ngomhla ka-12 kuNdasa nonyaka.
Kuleso sabelomali asethule ngoNdasa, umsindo wasuswa yisiphakamiso sikaGodongwana sokwenyusa iVAT ngo-0,5% ku-2025, iphinde yenyuswe ngo-0,5% ngo-2026.
Kwisabelomali asethule ngoLwesithathu uGodongwana uthe njengoba kuhoxisiwe ukwenyuswa kweVAT, ngakho-ke nesinqumo sokwandiswa kwezimpahla abathengi abangakhokhiswa kuzo iVAT siyahoxiswa.
Uqiniseke ukuthi iVAT izoqhuba ibe lapho ibivele ikhona ku-15%.
Ephawula ngomsindo owaqutshulwa yilesi siphakamiso sokwenyuswa kweVAT uthe: “Akumangazi ukuthi isiphakamiso sangomhla ka-12 kuNdasa sokwenyuswa kweVAT, sasusa impikiswano enkulu. Akunakungabaza ukuthi yimpikiswano ebalulekile, kodwa futhi eyadala ungabazana oluthile,” kusho uGodongwana.
Uqhube wathi isinqumo sokuhoxisa ukwenyuswa kweVAT sikhombisa ukuzibophezela kukahulumeni ukulalela abakhala ngakho abantu baseNingizimu Afrika, kanye nokulalela wonke amaqembu epolitiki ephalamende.
