UMENGAMELI we-Economic Freedom Front (EFF), uMnu Julius Malema, uyaziqhelelanisa noMnu Vusumuzi “Cat” Matlala, ogqunywe eKgosi Mampuru Correctional Centre, ePretoria, ngecala lokuzama ukubulala owayeyintombi yakhe.
UMatlala, othola amathenda ezigidi kuHulumeni, igama lakhe lishiwo nguMkhuzi wamaPhoyisa, waKwaZulu-Natal, uLt-Gen Nhlanhla Mkhwanazi, wathi uxhumene noNgqongqoshe wamaPhoyisa omisiwe, uMnu Senzo Mchunu, ekuphazamiseni ukusebenza kwamaphoyisa.
UMalema ubesesikhungweni sokuvota, eMponengele Primary School, eSeshego, ePolokwane, njengoba bekunokhetho lokuchibiyela. Ebuzwa ngalokhu okusabalele ezinkundleni zokuxhumana, kokuthi bayazana noCat, njengoba uMalema, eganwe yintombi yakwaMatlala, isibongo, uvele wabhodla umlimo.
“Hheyi! angimazi lowo muntu mina! Akabolele ejele, angihlangene naye, ngoba angimazi. Ungibuza ngezinto eziwumbhedo, ozizwa zikhulunywa ngabantu, zibe zikhona izinto ezibalulekile ezweni, ongangibuza ngazo. Ungalinge uphinde ungibuze ngezigebengu mina,” kusho uMalema, ephendula intatheli.
UMatlala, wathola ithenda ka-R396 mililon, yokulungisa isibhedlela saseThembisa, kodwa kwatholakala ukuthi umsebenzi kawenziwanga ngendlela efanele, negculisayo. Ngesikhathi izikhulu zoMnyango wezokuHlunyeleliswa kweziMilo zigasela eKgosi Mampuru kamuva nje, zithole umakhalekhukhwini egunjini obekugqunywe kulo uCat Matlala.
Owayengungqongqoshe wamaphoyisa, uMnu Bheki Cele, kuthiwa ungomunye wabaholi abake bahlala emzini kaCat, owubukhazikhazi esePitoli.
menzi.jele@ilanganews.co.za
