SINYUKILE isibalo sabantu abashone ezingozini zezimoto ngesikhathi samaholidi okuphela konyaka uma kuqhathaniswa nonyaka owedlule.
Lokhu kuvezwe uNgqongqoshe wezokuThutha ezweni lonke uNkk Babara Creecy ngesikhathi ethula izibalo zezingozi zezikhathi zamaholi ePretoria ngoMsombuluko.
UNkk Creecy uveze ukuthi ngalesi sikhathi sonyaka kushone abantu abawu-1502 okusho ukunyuka ngamaphesenti awu-5.3 uma kuqhathaniswa nonyaka owedlule.
Ungqongqoshe uthe izifundazwe okubalwa kuzo Eastern Cape, KwaZulu Natal neFree State izona ezibe nezibalo eziphezulu zabantu abashone ngezingozi zezimoto.
Uveze ukuthi Eastern Cape kusho abawu-70, kwathi iKZN babawu-54, Free State babawu-21 ngalesi sikhathi sonyaka.
UNgqongqoshe uthe kuyakhathaza ukuthi iningi lezi zingozi ezenzekalayo zenzeka ngokwephutha labashayeli.
Uthe u-87% wezingozi ezenzekile ngalesi sikhathi sonyaka zidalwe wukuba budedengu babashayeli bezimoto.
