Siphezulu isibalo sabokufika abangabavukuzi abangekho emthethweni, oZama Zama, abakhishwa emgodini wemayini si-Stilfontein, eNorth West.
Kusuka ngoMsombuluko uhulumeni uqale uhlelo lokutakula ama-Zama Zama asebehlale isikhathi eside kulo mgodi wemayini omdala, kanti kusukela luqalile lolu hlelo sekukhishwe abantu abangaphezu kuka-200.
Ngokusho kwebamba loMkhuzi wamaPhoyisa eNorth West uLt-Gen Patrick Asaneng, kusuka ngoMsombuluko sekukhishwe kwaboshwa abantu abawu-246, okungabawu-128 base-Mozambique, abawu-80 base-Lesotho, abawu-33 base-Zimbabwe nabawu-5 bakuleli.
U-Aseneng uphinde waqinisekisa ukuthi kuphinde kwakhishwa nezidumbu eziwu-78, isibalo sabashonile singaphezulu kwalesi esikhishwe ngamaphoyisa njengoba emasontweni edlule ngaphambi kokuqala kwawo uhlelo lokutakula amalungu omphakathi abezitakulela akhipha izidumbu ezicela kweziwu-9.
Lolu daba selubuya nasezinkantolo lapho izinhlangano zamalungelo abantu zazifuna kuphoqwe uhulumeni ukuba akhiphe laba bavuki.
Baveza ukuthi ngeke bakwazi ukuziphumela ngale kosizo lukahulumeni.
