SESIFINYELELE ku-5 isibalo sabantu osekuqinisekiswe ukuthi bashonile ngenxa yezikhukhula ezihambisana neziphepho eWestern Cape. Lokhu kuqinisekiswe nguNgongqoshe kaHulumeni waseKhaya nezeMvelo kulesi sifundazwe uMnu Antol Bredell namuhla ngoMsombuluko.
Uthe abezimo eziphuthumayo sebejutshwe ukuhlola umonakalo, ukwelekelela izisulu nokulungisa umonakalo odalwe yilesi simo sezulu, ikakhulukazi izolo ebusuku. Kusabalale ezinkundleni zokuxhumana izithombe nama-video ezikhulula emigwaqweni nasezindaweni zokuhlala, izihlahla eziwele emigwaqweni, nezingozi zezimoto – kwezinye amaloli elele ngohlangothi emuva kokupheshulwa wumoya.
Ihhovisi lezimo eziphuthumayo kuMasipala waseCape Town uthi uthola inqwaba yezingcingo ngabantu abadinga usizo ikakhulu ezindaweni ezinemijondolo.
Ngempelasonto uhulumeni kuzwelonke uhlonze njengenhlekelele isimo sezulu esiqhubekayo nokugadla ezingxenyeni zezifundazwe iWestern Cape, e-Eastern Cape, eNorthern Cape, eNorth West, eFree State naseMpumalanga.
