UBOSHWE okwesibili umfundisi webandla elaziwayo eDukuduku, eMtubatuba, ngecala lokubulala owesifazane ngoba esola unina (kamufi) ngokumthakatha.
UMnu Lucky Msawenkosi Menyuka, ongumfundisi ebandleni iGalile Church In Zion, khona eMtubatuba, ushaqwe ngamaphoyisa ngoMgqibelo ebusuku, kulandela ukuvuka kwecala lokubulala uNkz Thembelihle Nxumalo (25) owayeyisinqandamathe sakhe, mhla ka-17 kuNhlolanja (February) ngo-2020.
ILANGA labika ngalolu daba lapho okwavela khona ukuthi umufi noMenyuka babenobudlelwano bezothando, kodwa sebehlukene. Umndeni kamufi wathi ngemuva kokuba sebehlukene, uMenyuka wanuka unina kamufi ngokuthi uyamthakatha njengoba wayeke waxinwa wukugula.
Ngosuku abulawa ngalo, kuthiwa uMenyuka washayela ucingo umufi, emcela ukuba babonane eduze nakubo ngoba efuna badingide udaba lokuthi ngubani omtshele ukuthi uthakathwa ngunina. Kusolwa ukuthi sebehlangene, uMenyuka wagqema ngesando umufi, wabuye wamgwaza inqwaba yamanxeba.
Umndeni kamufi wasola ukuthi kukhona okungahambi kahle ngesikhathi engabuyi. Kwabikwa ukuthi umphakathi wabe sewuphuma inqina uthungatha umufi. Kwavela ukuthi isidumbu sakhe saze satholakala ngakusasa esimobeni, sinenqwaba yamanxeba okugwazwa.
UNkz Sbongile Nxumalo, ongunina kamufi, uthe ujabule ukuthi umsolwa useboshiwe futhi. Uthe bekumkhathaza ukubona umuntu owabulala indodakazi yakhe ezicanasela ngaphandle sengathi akenzanga lutho.
Okhulumela amaphoyisa KwaZulu-Natal, uConst Thenjiswa Ngcobo, ukuqinisekisile ukuboshwa kukaMenyuka, ngemuva kokuba inkantolo ikhiphe incwadi egunyaza ukuba aboshwe. Uthe phambilini icala lahoxiswa ngoba kusaqhubeka uphenyo, kanti sekutholakale obunye ubufakazi.
