PHUMLANI GAMA
UHLANGATSHEZWE ngohide lwezikhalo zamalungu omphakathi uNdunankulu waKwaZulu-Natal, uMnu Thami Ntuli, obehola ithimba longqongqoshe bekhabhinethi yakhe ebelihlangene nomphakathi enkundleni yezemidlalo eBhambanana, eJozini, ngoLwesithathu.
Lo mhlangano ubuyingxenye yomkha nkaso kahulumeni wesifundazwe, iSukuma Sakhe. Iningi lamalungu omphakathi elibevela kuwona wonke amawadi awu-23 angaphansi kukaMasipala waseJozini, likhale ngokungabi khona kwamanzi nemigwaqo engenela emakhaya. Amanye akhale ngokushoda kwemitholampilo nokuvalwa kwaleyo ekhona.
Kuvele ukuthi imigwaqo engekho esimweni inomthelela ongemuhle kubalimi bakule ndawo abacele ukufakelwa umshini womoba ngoba kuyibanga elide ukusuka nawo (umoba) eJozini, uyiswe
eMpangeni nasoPhongolo.
NGONGQONGQOSHE bekhabhinethi kahulumeni waKwaZulu-Natal, abebeyolalela izikhalo zamalungu omphakathi. ISITHOMBE NGU: NHLANHLA GUMEDE
UMnu Moses Masango, ongomunye wabalimi, uthe bacela nokuthi kubuyiswe uhlelo lwakudala lokuhanjiswa kwemithi emadiphini emfuyo.
Ongqongqoshe beminyango ethintekayo banikwe ithuba lokuphawula. Abanye babo kabafunanga ukuphawula ekubeni zibe khona izikhalo eziqondaniswe neminyango abayiholayo.
Ethula inkulumo yakhe uNtuli, uthe uhulumeni wakhe uhambele kule ndawo ngenhloso yokufeza umsebenzi othunywe wona ngabantu. “Ngiyalithanda ithuba lokuya emphakathini ngoba abantu bathola ithuba lokubika ngomonakalo owenzekayo ezindaweni abahlala kuzona. Inkinga esinayo wukuthi kunqanyulwe imali kuwona wonke amazinga kahulumeni. Lokhu kwenza singakwazi ukwenza konke ngesikhathi esisodwa. Ngiyazi ukuthi abafundele ubuthishela beze lapha ngoba befuna ukusitshela okusezinhliziyweni zabo. Kwezempilo sesi-ngqongqoze kaningi kodwa lutho ukuthola isixazululo ngenxa yesimo semali esifundazweni. Nokho-ke likhona ithemba lokuthi konke enikhala ngakho kuzoxazululwa,” kusho uNtuli.
