UCHAZE ngesimo sokugula neminyaka yakhe ewu-70 ubudala njengembangela yokucela ukuthi kuqedwe ngehora lesikhombisa ukuphekwa kwakhe ngemibuzo uMnu Paul O’Sullivan ngesikhathi evela phambi kwekomidi lePhalamende eliphenya ngezinsolo ezenziwa nguLt Gen Nhlanhla Mkhwanazi zokugxambukela kwepolitiki ekusebenzeni kwamaphoyisa nakwingalo yomthetho i-Ad Hoc.
U-O’Sullivan kuke kwaba nezihibe ukuvela kwakhe kuleli komidi phambilini njengoba akhala ngezikuphepha kwakhe kulandela ukuthola izinsolo zokusatshiswa kwempilo yakhe.
NgoLwesibili ugcine evelile phambi kwaleli komidi kanti ngaphambi kokuthi kuqale ukuphekwa kwakhe ngemibuzo wenze izicelo kuleli komidi.
Ucele ukuthi ukuphekwa kwakhe ngemibuzo kuleli komidi kungaqhubeki kuze kudlule ihora lesikhombisa ngenxa yesimo sempilo yakhe.
Uthe ngenxa yokugula kwakhe ngeke akwazi ukuhlala esihlalweni isikhathi eside njengoba kuphoqa ukuthi kushaye isikhathi esithile eselele ngenxa yokuhlaselwa yizinhlungu.
Nebala uSihlalo waleli komidi uMnu Soviet Lekganyane usivumile lesi sicelo sakhe.
Ube esefungiswa ukuthi uzokhuluma iqiniso lodwa phambi kwaleli komidi.
