UBOPHA osopolitiki abathathu okunguJulius Malema, uFikile Mbalula kanye noFundile Gade onguNgqongqoshe weMfundo eEastern Cape, uMnu Jaco Pieterse nguthishanhloko wesikole samabanga aphansi iBergview College, ebesematheni ezinyangeni ezedlule ngemuva kokuvela kwezinsolo zokunukubezwa kwentobazanyana eneminyaka ewu-7, uCwecwe.
UPieterse, ubephelezelwe yithimba labammeli be-Afriforum namuhla ekuseni ngesikhathi eyovulela labosopolitiki amacala okubalwa kuwo elokwehlisa isithunzi, ukusabisa kanye nokuphula umthetho iCybercrime Act esiteshini samaPhoyisa iSophiatown, eGoli. Kuzokhumbuleka ukuthi lothishanhloko waba ngudabuzekwayo ngesikhathi kuthiwa uyenqeba ukunikezela ulibofuzo lwakhe ukuze kuhlolwe ukuthi akathinteki yini ekunukubezweni kuka-Cwecwe.
Kulesi sikhathi yilapho labo sopolitiki abanikela khona emphakathini babeka imibona yabo engahlalanga kahle kulo thishanhloko. Ngenyanga eyedlule inhlangano eyengamele ezokushushisa kuleli I-NPA yaveza ukuthi ngeke iqhubeke nokushushisa leli cala ngoba ubufakazi abenele. Lokhu kwakulandela ukuthi kuphume umbiko owawuhlangula bonke abasolwa ababesolwa ngokunukubeza uCwecwe, kubalwa naye uthishanhloko. Okhulumela iAfriForum uMnu Barry Bateman uthi lesi sinqumo basethathe ngemuva komonakalo odaleke empilweni nasemsebenzini kaPieterse.
“Izwe libi, amacala okudlwengula maningi kakhulu. Ukusolwa ngezinsolo ezifana nalezi kuza nomkhulu omonakalo okungelula ukuwulungisa, yikho ke sinqume ukuvula lamacala. Okwenziwa yilabo sopolitiki akwemukelekile, kumele kube nezinyathelo ezithathwayo ezizoba yisifundo kulabo abahlulela abanye ngamacala abangawazi esidlangalaleni. Isenzo saba senza izinto zabanzima kakhulu njengoba ezinkundleni zokuxhumana njengoba ababekusho kwakukholwa abaningi ngale kokuzibuza imibuzo efanele,” esho.
