IFISELE izilokotho ezinhle izimbali zezwe layo iNgonyama uMakhosetive ‘Mswati III’ Dlamini. UMswati wamukele umhlanga owethulwe yezintombi-nto ebe zivela ezingxenyeni ezahlukene zezwe lakhe ngoMgqibelo.
UMkhosi woMhlanga wakuleliya lizwe ububanjelwe esigodlweni eLudzidzini, kaLobamba, phakathi kwedolobha iManzini nenhloko-dolobha yakhona iMbabane. Lo mkhosi uthathe isonto lonke. Uhanjelwa ngisho nangamantombazanyana aneminyaka esukela kweyisikhombisa.
Owakulo nyaka ubuhanjelwe yizicukuthwane ezivela emazweni ahlukene, okubalwa kuzona uMnu Ian Khama owayengumengameli waseBotswana, uMnu Emmerson Mnangangwa onguMengameli waseZimbabwe, noMnu Jacob Zuma owayengumengameli waseNingizimu-Afrika.
Phakathi kwabethule umhlanga phambi kweNgonyama uMswati kubalwa nondlunkulu wayo omncane uNomcebo Zuma-Dlamini. UNomcebo waqokwa yiSilo Mswati III kuwona lo mcimbi nyakenye.
Uyindodakazi kaMnu Zuma ongumngani omkhulu weNgonyama uDlamini. Yethula inkulumo yayo iNgonyama, ifisele izimbali zezwe layo izilokotho ezinhle zonyaka nangonyaka ozayo.
