IKHULUNYELWA phansi eyokugcotshelwa kwesokuba ngumfundisi kwenkakha yezokusakaza uLinda “Mr Magic” Sibiya osanda kujoyina iGagasi FM, lapho eshayela khona izinhlelo zenkolo.
UMr Magic owazakhela udumo esakaza oKhozini FM, ujoyine iGagasi kulo nyaka ngemuva kweminyaka engazwakali emoyeni. usakaza ihora elilodwa ekuseni phakathi nezinsuku nohlelo olugcwele ngamaSonto.
ILANGA lithole ukuthi ngempelasonto yePhasika uMr Magic, waphakanyiswa kwesokuba ngumfundisi enkonzweni enkulu yebandla iSambulo ngaphansi kukamBhishobhi uMkhwanazi. Umthombo weLANGA osondelene nalo msakazi, uthi bekungaqali ukuba uMr Magic aphakanyiselwe kwesokuba umfundisi, njengoba eminyakeni eyedlule wake waphakanyiswa, kodwa wazwakalisa ukuthi akakakulungeli.
“Kulokhu ukhombise intshisekelo, seziqalile nezinhlelo zomcimbi wokumgcoba, okulindeleke ukuba ube kubo eShowe ngoNhlangulana (June),” kusho umthombo.
Uveze ukuthi uMr Magic nakuba ekwamukela lokhu kuphakanyiswa, kodwa unovalo ngenxa yokuthi ukuba ngumfundisi kuza nomsebenzi omningi. Lo mthombo uthe akakabi naso isiqiniseko ngokuthi uMr Magic uzovula ibandla, noma uzoqhubeka nokuhambela amabandla ahlukene. ILANGA lixhumane nomunye wabefundisi abasondelene noMr Magic, naye okuqinisekisile ukuthi lo msakazi usezoba ngumfundisi ngokusemthethweni.
“Sesike sakuxoxa naye lokhu, waveza nokuthi useke wakuzilela ukuze azilungiselele,” kusho lo mfundisi ocele ukungadalulwa, kodwa kuthintwe uMr Magic ngqo ngalolu daba. UMr Magic uqale ngokubabaza ebuzwa ngalolu daba. Uthe akakalungeli ukuphawula ngalolu daba kwabezindaba.
“Okwamanje akukho engizokusho ngaphandle kokuthi ngizolandela imiyalelo kambhishobhi wami ongiholayo,” kusho yena.
Uthembise ukudlulisela inombolo yocingo kambhishobhi wakhe kwiLANGA, kodwa kuze kwashaya isikhathi sokushicilela engakayithumeli. UMr Magic akayena umsakazi wokuqala ukungena ebufundisini njengoba uSipho “DJ Sgqemeza” Mbatha owayengumsakazi oKhozini FM naye osengumfundisi.
UMr Magic wazakhela udumo kwezokusakaza nangezinkulumo ezakhayo lapho ayebambisene khona noMfu Sithembiso Zondo, baze baba nomzungezo wokuhambela amabandla obizwa ngokuthi, “Its Not Over Until God Says It’s Over Tour”.
